5 اگست 2019 مقبوضہ جموں و کشمیر کی تاریخ کا ایک ایسا سنگ میل ہے جو نہ صرف خطے کے عوام بلکہ بھارت کے وفاقی ڈھانچے کے لیے بھی فیصلہ کن موڑ ثابت ہوا۔ اس دن بھارتیہ جنتا پارٹی کی حکومت نے آئین کے آرٹیکل 370 اور 35A کو ختم کر کے مقبوضہ کشمیر کی خصوصی حیثیت چھین لی۔ یہ اقدام بظاہر ترقی اور مین اسٹریمنگ کے نام پر کیا گیا، مگر حقیقت میں یہ بھارتی نوآبادیاتی عزائم کا کھلا اظہار تھا۔ اس فیصلے نے بھارت کے وفاق کے اندر موجود کمزوریاں مزید نمایاں کر دیں اور وفاقی ڈھانچے کو گہرے شگافوں میں دھکیل دیا۔
بی جے پی حکومت نے دعویٰ کیا کہ آرٹیکل 370 ترقی کی راہ میں رکاوٹ تھا اور اس کی منسوخی کے بعد مقبوضہ جموں و کشمیر میں خوشحالی کا دور شروع ہوگا۔ وزیر اعظم نریندر مودی نے وعدہ کیا کہ غیر مقامی سرمایہ کار آئیں گے، صنعتیں لگیں گی، روزگار پیدا ہوگا اور عام شہری کے معیارِ زندگی میں نمایاں بہتری آئے گی۔ مگر یہ سب محض وعدے ہی رہے۔
2019 کے بعد کے اعداد و شمار اس حقیقت کو بے نقاب کرتے ہیں کہ ترقی کا یہ بیانیہ ایک سیاسی ڈھونگ سے زیادہ کچھ نہیں تھا۔ ریاستی معیشت، جس کی مالیت تقریباً 30 ارب ڈالر تھی، آرٹیکل 370 کی منسوخی کے بعد سست روی کا شکار ہو گئی۔ مقبوضہ جموں و کشمیر کی مجموعی گھریلو پیداوار کی شرح نمو میں نمایاں کمی دیکھنے میں آئی۔ حقیقی شرح نمو کی گراوٹ زیادہ شدید رہی جس نے قومی اوسط سے بھی کم سطح پر خطے کی ترقی کو لا کھڑا کیا۔ نتیجہ یہ نکلا کہ قومی جی ڈی پی میں مقبوضہ جموں و کشمیر کا حصہ گھٹ کر صرف 0.77 فیصد رہ گیا۔
سروسز کا شعبہ، جو مقامی معیشت کا 60 فیصد حصہ بناتا ہے، 2022-23 میں 11 فیصد کی ترقی سے سکڑ کر 2023-24 میں محض 5.8 فیصد رہ گیا۔ اس کے ساتھ ہی فی کس آمدنی میں کمی، نوجوانوں میں بے روزگاری کی بلند ترین شرح اور صنعتی سرمایہ کاری میں شدید کمی نے مقامی عوام کو مزید مایوسی میں دھکیل دیا۔ بڑے بڑے کارپوریٹ منصوبوں کے وعدے عملی شکل اختیار نہ کر سکے اور غیر مقامی سرمایہ کاروں کا ہجوم تو دور، مقامی کاروباری طبقہ بھی عدم تحفظ کا شکار ہوا۔
5 اگست کے بعد مقبوضہ کشمیر کو ایک تجربہ گاہ میں بدل دیا گیا۔ مقامی عوام کو سیاسی، آئینی اور انتظامی لحاظ سے بے اختیار کر دیا گیا۔ زمینوں کی ملکیت کے قوانین میں تبدیلی کر کے غیر مقامی افراد کو زمین خریدنے کا حق دے دیا گیا جس نے آبادیاتی تناسب کو بگاڑنے کا عمل تیز کر دیا۔ یہ اقدام صرف معاشی پہلو نہیں رکھتا بلکہ اس کا مقصد خطے کی مسلم شناخت کو کمزور کرنا اور ایک منظم آبادکار نوآبادیاتی نظام کو نافذ کرنا ہے۔
آرٹیکل 370 اور 35A کی منسوخی محض کشمیر تک محدود نہیں رہی۔ اس فیصلے نے بھارت کی دیگر ریاستوں میں بھی شکوک و شبہات کو جنم دیا۔ تامل ناڈو، بہار اور دیگر ریاستوں میں یہ خوف بڑھا کہ اگر مرکز کسی ریاست کی خصوصی حیثیت ایک جھٹکے میں ختم کر سکتا ہے تو کل کو یہ قدم ان کے ساتھ بھی اٹھایا جا سکتا ہے۔
بہار میں ریاستی رہائشی سرٹیفکیٹ (SIR) پالیسی لاکھوں افراد کو ووٹ کے حق سے محروم کرنے کی دھمکی دے رہی ہے جبکہ غیر مقامی ووٹروں کے بڑے پیمانے پر اندراج کے ذریعے انتخابی انجینئرنگ کا عمل تیز ہو چکا ہے۔ یہ وہی ماڈل ہے جو مقبوضہ کشمیر میں آزمایا گیا تھا اور اب دیگر ریاستوں میں بھی لاگو کرنے کی کوشش کی جا رہی ہے۔
بی جے پی کا یہ قدم صرف آئینی ترمیم نہیں بلکہ جمہوری اقدار پر ہندوتوا نظریے کا براہِ راست حملہ تھا۔ مین اسٹریمنگ کے نام پر مقبوضہ کشمیر کے عوام کو سیاسی طور پر غیر مؤثر بنایا گیا۔ ان کے نمائندہ ادارے کمزور کر دیے گئے اور بنیادی شہری آزادیوں کو محدود کیا گیا۔ میڈیا پر قدغن، سیاسی کارکنوں کی گرفتاری اور عام شہریوں پر بڑھتا ہوا دباؤ ایک ایسے سیاسی ماحول کی عکاسی کرتا ہے جہاں اختلافِ رائے کے لیے کوئی جگہ نہیں۔
زراعت اور سیاحت جو مقبوضہ جموں و کشمیر کی معیشت کی ریڑھ کی ہڈی سمجھی جاتی ہیں مسلسل زوال کا شکار ہیں۔ سیاحت کے شعبے میں اگرچہ وقتی اضافہ دکھایا گیا لیکن زمینی حقائق بتاتے ہیں کہ یہ زیادہ تر اعداد و شمار کا کھیل ہے۔ غیر مقامی سرمایہ کاروں کو راغب کرنے کی کوششوں نے مقامی کاروباروں کو دباؤ میں ڈال دیا۔
بھارت نے اپنے اس اقدام کو عالمی برادری کے سامنے اندرونی معاملہ قرار دیا۔ مگر انسانی حقوق کی تنظیموں اور بین الاقوامی میڈیا نے بارہا مقبوضہ کشمیر میں بنیادی آزادیوں کی خلاف ورزیوں کو بے نقاب کیا۔ اقوامِ متحدہ کے ماہرین نے بھی آبادیاتی تبدیلیوں اور سیاسی حقوق کی پامالی پر تشویش ظاہر کی۔
مودی حکومت کے اقدامات بھارت کو ایک ایسے راستے پر لے جا رہے ہیں جو اندرونی سطح پر تقسیم اور بیرونی سطح پر تنہائی کا باعث بن سکتا ہے۔ کشمیر کا ماڈل اگر دیگر ریاستوں پر آزمایا گیا تو بھارت کے وفاقی ڈھانچے کی بنیادیں مزید کمزور ہوں گی جس کے خطے اور عالمی امن پر خطرناک اثرات مرتب ہو سکتے ہیں۔
5 اگست 2019 صرف ایک دن نہیں بلکہ ایک طویل المیے کی شروعات ہے۔ ترقی اور خوشحالی کے وعدوں کا پردہ اب چاک ہو چکا ہے اور ظلم و جبر کی حقیقت پوری دنیا کے سامنے ہے۔ مقبوضہ کشمیر کے عوام اب بھی اپنی شناخت، زمین اور اختیار کی حفاظت کے لیے جدوجہد کر رہے ہیں۔ یہ دن ہمیشہ ایک سیاہ دن کے طور پر یاد رکھا جائے گا، ایک ایسا دن جب آئینی اور جمہوری اقدار کو ہندوتوا کی سیاست کے تلے روند ڈالا گیا۔
اعلان دستبرداری: اس مضمون میں بیان کردہ خیالات اور آراء خصوصی طور پر مصنف کے ہیں اور پلیٹ فارم کے سرکاری موقف، پالیسیوں یا نقطہ نظر کی عکاسی نہیں کرتے ہیں۔
