گلگت بلتستان وطن عزیز کا ایسا خطہ ہے جو بجا طور پر دیوتاؤں کی سرزمین کا مستحق ہے۔ برف پوش اور بلند و بالا پہاڑ، حسین وادیاں اور نیلگوں جھیلیں اقوام عالم میں اس خطے کی پہچان ہیں۔
صدیوں پرانا ثقافتی ورثہ گلگت بلتستان کو نہ صرف پاکستان بلکہ عالمی سطح پر ایک انمول تحفہ بناتا ہے۔ ثقافتی تنوع، قدرتی وسائل اور جغرافیائی حیثیت کے باعث یہ علاقہ پاکستان کی شناخت کا حصہ ہے اور مستقبل میں ملک کی معیشت اور سیاحت میں مرکزی کردار ادا کرنے کی بھرپور صلاحیت رکھتا ہے۔
گلگت بلتستان میں دنیا کی پانچ میں سے چار بلند ترین چوٹیاں موجود ہیں۔ کے ٹو، نانگا پربت، گیشربرم اور براڈ پیک وہ پہاڑی سلسلے ہیں جو دنیا بھر کے کوہ پیماؤں کی توجہ اپنی جانب کھینچ لیتے ہیں۔ یہ پہاڑ ایڈونچر کا شوق رکھنے والوں کے لیے بھی جنت ہیں اور پاکستان کی قوت اور قدرتی عظمت کی علامت بھی ہیں۔ ان بلند چوٹیوں کے دامن میں بہتے جھرنے، آبشاریں اور سبزہ زار ایسا دلکش منظر پیش کرتے ہیں جو دیکھنے والے پر سحر طاری کر دیتے ہیں۔
سکردو، غذر، شگر، ہنزہ اور نگر جیسی وادیاں اپنی فطری خوبصورتی اور شفاف فضا کے باعث آنے والوں کا دل اپنی جانب موڑ لیتی ہیں۔ یہ جنت نظیر علاقے سیاحت کے ایسے مراکز ہیں جو پاکستان کا حقیقی حسن دنیا کے سامنے لاتے ہیں۔
گلگت بلتستان کا علاقہ سیاحتی کشش کے ساتھ ساتھ ثقافتی رنگا رنگی کی عکاسی بھی کرتا ہے۔ یہاں کے لوگ مہمان نوازی، روایتی پہناووں اور دلوں کو چھو لینے والی لوک موسیقی کے ذریعے منفرد ثقافتی تجربہ فراہم کرتے ہیں۔
گلگت بلتستان کی قدیم ثقافت صدیوں پرانی تاریخ کی آئینہ دار ہے۔ یہاں بولی جانے والی زبانوں کا حسن بھی بدرجہ اتم موجود ہے۔ شینا، وخی، بروشسکی، بلتی اور کھوار گلگت بلتستان کی نمایاں زبانیں ہیں اور انہی زبانوں کے ذریعے منتقل ہوتی صدیوں پرانی روایات آج بھی زندہ ہیں۔ لوک رقص، مقامی موسیقی اور رنگا رنگ تہوار اس خطے کی ثقافتی رونق میں اضافہ کرتے ہیں۔
گلگت بلتستان کے تہواروں کا ذکر کیا جائے تو نوروز ہو یا فصلوں کی کٹائی کا تہوار، یا پھر مویشیوں کی نمائش کا تہوار جو مقامی زبان میں یاک شو کہلاتا ہے۔ یہ تہوار سماجی یکجہتی اور روایتی جوش و خروش کی عکاسی کرتے ہیں اور پاکستان کے اس حصے کی جیتی جاگتی تصویر ہیں جہاں کے باسی قدیم قدروں اور جدید رجحانات کو ساتھ لے کر چل رہے ہیں۔
گلگت بلتستان دنیا بھر میں کوہ پیمائی اور ایڈونچرز کے مرکز کے طور پر بھی مشہور ہے۔ یہاں دنیا کے نامور کوہ پیما ہر سال آتے ہیں اور کے ٹو، نانگا پربت سر کرنے کی کوشش کرتے ہیں۔ اس کے علاوہ ہائکنگ، ٹریکنگ، رافٹنگ اور راک کلائمبنگ جیسے کھیلوں کے مواقع بھی موجود ہیں۔
ایک طرف سکردو کی ستپارہ اور شنگریلا جھیلیں اپنی خوبصورتی اور سکون کے باعث اپنی مثال آپ ہیں تو دوسری جانب دیوسائی کے سبزہ زار، بلند و بالا چراگاہوں اور جنگلی حیات کے باعث ایک نایاب تجربہ فراہم کرتے ہیں۔
وفاقی حکومت نے گذشتہ چند برسوں میں گلگت بلتستان کو عالمی سیاحتی مقام میں تبدیل کرنے کے لیے متعدد اقدامات کیے ہیں۔ سڑکوں کی تعمیر سمیت بنیادی ڈھانچے کی بہتری، ایئر پورٹس کی توسیع اور جدید سہولیات کی فراہمی کی وجہ سے گلگت بلتستان میں سیاحوں کی تعداد میں مسلسل اضافہ ہو رہا ہے۔
وفاقی حکومت کا یہ وژن صرف سیاحت تک محدود نہیں بلکہ اس وژن میں ماحولیاتی سیاحت اور پائیدار ترقی بھی شامل ہیں۔ اس عمل میں مقامی لوگوں کو بھی شامل کیا جا رہا ہے تاکہ ان کے معاشی حالات بہتر ہو سکیں اور ماحول کا تحفظ بھی ممکن ہو سکے۔
غیر مسخ شدہ فطرت گلگت بلتستان کا بڑا سرمایہ ہے۔ بلند و بالا پہاڑ، برف سے ڈھکے گلیشیئرز، آبشاریں اور ندیاں دنیا بھر میں اپنا ثانی نہیں رکھتیں۔ دوسری جانب سیاحت میں اضافہ کی وجہ سے ماحول پر دباؤ بڑھتا جا رہا ہے۔ یہی وجہ ہے کہ وفاقی اور صوبائی حکومتوں نے ماحولیاتی چیلنجز کو مدنظر رکھتے ہوئے ماحولیاتی سیاحت کا تصور متعارف کروایا ہے۔
کچرا ٹھکانے لگانے کا انتظام، پلاسٹک بیگز اور دیگر اشیاء کے استعمال میں کمی، جنگلی حیات کا تحفظ اور مقامی لوگوں کی شمولیت کے ذریعے گلگت بلتستان کے قدرتی نظاروں کو آئندہ نسلوں کے لیے محفوظ بنانے کی کوشش کی جا رہی ہے۔
گلگت بلتستان صرف پاکستان ہی نہیں بلکہ دنیا کے لیے بھی انتہائی قیمتی خطہ ہے۔ یہ علاقہ پاکستان چین اقتصادی راہداری کا دروازہ ہے، جو پاکستان کو عالمی تجارتی نیٹ ورک سے جوڑتا ہے۔ جبکہ بھارت کے ساتھ لائن آف کنٹرول اور کارگل کے پہاڑی سلسلے اس خطے کی جغرافیائی اور دفاعی اہمیت میں اضافہ کرتے ہیں۔ یہی وجہ ہے کہ پاکستان کے لیے گلگت بلتستان کی اہمیت صرف سیاحتی مرکز کے طور پر نہیں بلکہ قومی سلامتی اور ترقی کے زاویے سے بھی کئی گنا زیادہ ہے۔
گلگت بلتستان پاکستان کا فخر ہے۔ یہاں کی پرشکوہ بلندیاں پاکستان کی یکجہتی اور عزم کی مثال ہیں۔ کوئی سیاح جب ہنزہ اور سکردو کی وادیاں دیکھتا ہے تو وہ اصل میں پاکستان کی عظمت کا مشاہدہ کر رہا ہوتا ہے۔
گلگت بلتستان پاکستان کے لیے محض ایک خطہ نہیں بلکہ قومی شناخت کی نشانی ہے۔ اس علاقہ کا مستقبل معیشت، ثقافت اور دفاع کے ہر میدان میں روشن ہے۔ پاکستان کی جانب سے گلگت بلتستان کی شان و شوکت کو عالمی سطح پر اجاگر کرنے کے لیے کیے گئے اقدامات یقینا بار آور ثابت ہوں گے اور آئندہ سالوں میں اس خطے کو دنیا کے نقشے پر نمایاں مقام دلائیں گے۔
اعلان دستبرداری: اس مضمون میں بیان کردہ خیالات اور آراء خصوصی طور پر مصنف کے ہیں اور پلیٹ فارم کے سرکاری موقف، پالیسیوں یا نقطہ نظر کی عکاسی نہیں کرتے ہیں۔
