بھارت میں حالیہ برسوں کے دوران ہندو قوم پرست بھارتیہ جنتا پارٹی حکومت نے مسلسل ایسے اقدامات کیے ہیں جن کا بنیادی ہدف مسلمانوں کی مذہبی، سماجی اور ثقافتی شناخت کو کمزور کرنا ہے۔ ان اقدامات میں کبھی بابری مسجد کی شہادت کو قانونی جواز فراہم کیا گیا، کبھی یکساں سول کوڈ کے نام پر مسلمانوں کے ذاتی قوانین کو چیلنج کیا گیا اور اب قانونِ ترمیم وقف 2025 اس سلسلے کی سب سے تازہ اور سنگین کڑی ہے۔ یہ قانون بظاہر وقف بورڈز میں شفافیت اور بدعنوانی ختم کرنے کے نام پر بنایا گیا ہے لیکن اس کی دفعات کو دیکھ کر واضح ہوتا ہے کہ اس کا مقصد مسلمانوں کی مذہبی خودمختاری کو محدود کرنا اور بی جے پی کے نظریاتی ایجنڈے کو آگے بڑھانا ہے۔ سب سے بڑا المیہ یہ ہے کہ بھارتی سپریم کورٹ جو اقلیتوں کے آئینی و مذہبی حقوق کا محافظ ہونا چاہیے تھا اس قانون کو روکنے میں ناکام رہا۔ عدالت نے چند شقوں پر تو جزوی ریلیف دیا مگر مجموعی طور پر بی جے پی کے بیانیے کی توثیق کی جو ایک خطرناک نظیر بن سکتی ہے۔
قانونِ ترمیم وقف 2025 کی سب سے متنازع شق یہ ہے کہ وقف بنانے کے لیے کسی فرد کو لازمی طور پر کم از کم پانچ سال تک اسلام پر عمل پیرا رہنا ہوگا۔ یہ شرط اسلامی شریعت کے سراسر خلاف ہے کیونکہ اسلام قبول کرنے والا شخص اپنی نئی مذہبی شناخت کے بعد فوری طور پر تمام اسلامی حقوق و فرائض کا اہل ہوتا ہے۔ اس شق کو لاگو کر کے بی جے پی نے گویا مذہبی آزادی کو ریاستی اجازت سے مشروط کر دیا ہے۔ اسی طرح ایک اور شق کے تحت ضلع کلکٹرز کو یہ اختیار دیا گیا ہے کہ وہ وقف جائیدادوں کو سرکاری ملکیت قرار دے سکیں۔ اس سے مسلمانوں کے ہزاروں مذہبی و سماجی ادارے خطرے میں آ گئے ہیں۔ معروف مسلم رہنما اسد الدین اویسی نے اس قانون کو آئین کے آرٹیکلز 14، 25، 26 اور 30 کی کھلی خلاف ورزی قرار دیا ہے۔ ان کے مطابق یہ ترمیم نہ صرف مسلمانوں کے مذہبی اداروں پر ریاستی کنٹرول کو بڑھائے گی بلکہ وقف بورڈز میں ان کی نمائندگی بھی کمزور کرے گی۔
مسلم کمیونٹی، حزبِ اختلاف کی جماعتیں اور اقلیتی حقوق کے کارکنان بھی اس قانون کے خلاف یک زبان ہیں۔ ان کے نزدیک یہ ترمیم بی جے پی کے اس بڑے منصوبے کا حصہ ہے جس کے ذریعے مسلمانوں کو سماجی و معاشی طور پر پسماندہ رکھا جائے۔ 15 ستمبر 2025 کو بھارتی سپریم کورٹ نے اس معاملے پر فیصلہ سناتے ہوئے کچھ شقوں کو تو عارضی طور پر معطل کیا جیسے پانچ سال کی شرط اور ضلع کلکٹرز کے اختیار کو فی الحال روک دیا گیا لیکن عدالت نے پورے قانون کو غیر آئینی قرار دینے سے انکار کر دیا۔ عدالت نے اپنے فیصلے کو نادر ترین مداخلت کے اصول کے تحت فریم کیا اور کہا کہ قانون سازی میں عدلیہ کا کردار محدود ہے۔ اس مؤقف نے عملاً بی جے پی کو یہ پیغام دیا کہ اس کا ایجنڈا آئینی تحفظات سے بالاتر ہے۔ ناقدین کا کہنا ہے کہ عدالت نے جان بوجھ کر مسلمانوں کے مذہبی اور آئینی اعتراضات کو نظرانداز کیا اور سیاسی استحکام کو ترجیح دی۔ اس طرح سپریم کورٹ نے خود کو ایک غیر جانبدار ادارے کے بجائے حکومتی ایجنڈے کے ساتھ ہم آہنگ ثابت کیا۔
بی جے پی کا دعویٰ ہے کہ یہ قانون وقف بورڈز میں بدعنوانی کم کرنے اور شفافیت بڑھانے کے لیے بنایا گیا ہے۔ لیکن حقیقت یہ ہے کہ بدعنوانی کے خاتمے کے نام پر مسلمانوں کے مذہبی اداروں کو ریاستی کنٹرول میں لینا ہندو قوم پرست ایجنڈے کا حصہ ہے۔ یہ قانون بی جے پی کے ووٹ بینک کو مضبوط کرتا ہے کیونکہ ہندو قوم پرست طبقات ایسے اقدامات کو مسلمانوں پر "ضبط” اور "قانون کی حکمرانی” کے نام پر سراہتے ہیں۔ لیکن اس کے نتیجے میں ملک میں فرقہ واریت اور مذہبی تقسیم مزید گہری ہو رہی ہے۔
مسلم تنظیموں اور اقلیتی حقوق کے کارکنوں نے اس قانون کو کھلی سازش قرار دیا ہے۔ ان کے مطابق سپریم کورٹ کی جزوی توثیق نے بی جے پی کو ایک ایسا قانونی سہارا دیا ہے جس کے ذریعے وہ وقف بورڈز پر براہِ راست اثر و رسوخ بڑھا سکے گی۔ یہ فیصلہ اس بات کی علامت ہے کہ بھارت میں سیاست اور عدلیہ کے درمیان خطرناک ہم آہنگی پروان چڑھ رہی ہے۔ عدالت نے چند وقتی ریلیف دے کر مسلمانوں کو وقتی طور پر مطمئن کرنے کی کوشش کی لیکن مجموعی طور پر قانون کا ڈھانچہ برقرار رکھا۔ اس کے نتیجے میں مسلمانوں کے مذہبی اثاثے ریاستی کنٹرول کے خطرے سے دوچار ہیں۔
یہ فیصلہ ایک ایسا سابقہ بھی قائم کرتا ہے جس کے تحت آئندہ کسی بھی سیاسی جماعت کو یہ موقع مل سکتا ہے کہ وہ اپنی نظریاتی خواہشات کو عدالتی فیصلوں کے ذریعے آئینی تحفظ کے پردے میں آگے بڑھائے۔ قانون ترمیم وقف 2025 نہ صرف مسلمانوں کی مذہبی آزادی پر حملہ ہے بلکہ یہ بھارت کے آئینی ڈھانچے پر بھی سوالیہ نشان ہے۔ آئین کے آرٹیکلز 25 اور 26 ہر شہری کو مذہبی آزادی اور مذہبی اداروں کے انتظام کا حق دیتے ہیں۔ لیکن اس قانون کے ذریعے ان حقوق کو محدود کر کے ریاست کو مذہبی اداروں پر بالادست بنا دیا گیا ہے۔
ابھی تک عالمی برادری کی طرف سے اس قانون پر محدود ردعمل سامنے آیا ہے۔ تاہم انسانی حقوق کے ادارے اس بات پر متفق ہیں کہ یہ قانون اقلیتوں کے خلاف امتیازی سلوک کے زمرے میں آتا ہے۔ اقوام متحدہ کے اقلیتی حقوق کے خصوصی نمائندے نے کہا ہے کہ بھارت جیسے جمہوری ملک میں ایسے قوانین کا منظور ہونا انتہائی تشویشناک ہے اور یہ بین الاقوامی انسانی حقوق کے معیارات کے منافی ہے۔
قانون ترمیم وقف 2025 کے بعد بھارت میں مسلمانوں کے لیے مذہبی آزادی کے مزید سکڑنے کا خدشہ بڑھ گیا ہے۔ اگر اس قانون کو چیلنج کرنے کے لیے جامع اور متحدہ حکمت عملی اختیار نہ کی گئی تو مستقبل میں مدارس، مساجد اور دیگر مذہبی ادارے بھی ریاستی کنٹرول کے دائرے میں لائے جا سکتے ہیں۔ یہ فیصلہ مسلمانوں کے لیے ایک کڑا امتحان ہے۔ انہیں نہ صرف قانونی اور سیاسی سطح پر بلکہ سماجی اور عالمی سطح پر بھی اپنی آواز بلند کرنی ہوگی۔
قانون ترمیم وقف 2025 اور اس پر سپریم کورٹ کے فیصلے نے یہ واضح کر دیا ہے کہ بھارت میں مذہبی آزادی اور اقلیتوں کے حقوق کس طرح بتدریج محدود کیے جا رہے ہیں۔ عدالت کا جزوی ریلیف دراصل بی جے پی کے ایجنڈے کی توثیق ہے جس نے مسلمانوں کو ان کے آئینی تحفظ سے محروم کر دیا ہے۔ یہ معاملہ صرف مسلمانوں کے مذہبی حقوق کا نہیں بلکہ بھارت کی جمہوری ساکھ اور آئینی بالادستی کا بھی ہے۔ اگر عدلیہ سیاسی ایجنڈے کے سامنے جھکتی رہی تو آئین کے بنیادی اصول خطرے میں پڑ جائیں گے۔ مسلمانوں کے لیے یہ جدوجہد اس بات کی یاد دہانی ہے کہ آزادی اور مذہبی خودمختاری کبھی تحفے میں نہیں ملتیں بلکہ انہیں مسلسل جدوجہد کے ذریعے حاصل اور برقرار رکھنا پڑتا ہے۔
اس مضمون میں بیان کردہ خیالات اور آراء خصوصی طور پر مصنف کے ہیں اور پلیٹ فارم کے سرکاری موقف، پالیسیوں یا نقطہ نظر کی عکاسی نہیں کرتے ہیں۔
