مدارس ہمیشہ اسلامی تہذیب و تمدن کی بنیاد اور علمی روایت کے محافظ رہے ہیں۔ برصغیر سے لے کر وسطی ایشیا اور مشرق وسطی تک مدارس نے ایسے علماء، صوفیا اور مصلحین پیدا کیے جنہوں نے علم و حکمت، امن و محبت اور اخلاقی رہنمائی کے ذریعے معاشروں کو روشنی بخشی۔ امام ابو حنیفہ، امام غزالی اور شاہ ولی اللہ دہلوی جیسی عظیم ہستیاں اسی روایات کی پیداوار تھیں۔ لیکن گزشتہ چند دہائیوں میں بعض شدت پسند گروہوں نے مدارس کے مقدس مقام کو مسخ کرنے کی کوشش کی اور انہیں اپنے سیاسی و عسکری مقاصد کے لیے استعمال کیا۔ نتیجہ یہ نکلا کہ یہ ادارے جو کبھی علم و امن کے گہوارے تھے الزام اور بدگمانی کا شکار ہو گئے۔
"اقْرَأْ بِاسْمِ رَبِّكَ الَّذِي خَلَقَ” (العلق 96:1-5)
دراصل اس حقیقت کو اجاگر کرتی ہے کہ اسلام علم اور تحقیق کا دین ہے نہ کہ تلوار اور تشدد کا۔
:رسول اکرم ﷺ نے فرمایا
"العلماء ورثة الأنبياء” (سنن ابی داؤد 3641)
یعنی علماء کا مقام رہنمائی ہے انتشار نہیں۔
اس لیے مدارس کا اصل مقصد ایسے علماء تیار کرنا ہونا چاہیے جو امت کو اتحاد، امن اور اخلاق کی طرف بلائیں۔
تاریخ اس بات کی گواہ ہے کہ مدارس نے صدیوں تک مسلمانوں کو علمی، فکری اور روحانی قیادت فراہم کی۔ امام غزالی نے فلسفہ اور تصوف کے امتزاج سے مسلمانوں کو فکری رہنمائی دی جبکہ شاہ ولی اللہ دہلوی رحمتہ اللہ علیہ نے برصغیر میں اسلامی علوم اور سماجی اصلاحات کی نئی روح پھونکی۔ یہی مدارس تھے جنہوں نے تحریک آزادی ہند میں بھی اپنا کردار ادا کیا اور مسلمانان برصغیر کو شناخت اور قیادت فراہم کی۔ ان مثالوں سے واضح ہے کہ مدارس ہمیشہ مثبت تبدیلی اور علمی ترقی کا ذریعہ رہے۔
بدقسمتی سے کچھ شدت پسند گروہوں نے مخصوص مدارس کو عسکری بھرتی اور انتہا پسندی کے مراکز میں بدلنے کی کوشش کی، جس سے نہ صرف ملک کی داخلی سلامتی متاثر ہوئی بلکہ عالمی سطح پر پاکستان کی ساکھ کو بھی نقصان پہنچا۔
اس چیلنج کو مدنظر رکھتے ہوئے حکومت پاکستان نے مختلف سطحوں پر اصلاحات کا آغاز کیا۔ مدارس کی رجسٹریشن یعنی تمام مدارس کو ایک مرکزی نظام کے تحت رجسٹر کیا جا رہا ہے تاکہ ان کی نگرانی شفاف اور مربوط ہو۔ نصاب میں جدت لانے کے لیے دینی علوم کے ساتھ ساتھ ریاضی، سائنس، انگریزی اور شہری تعلیم جیسے مضامین کو شامل کیا گیا ہے تاکہ طلبہ جدید دنیا کے تقاضوں کے مطابق تعلیم حاصل کر سکیں۔
2018 میں 1800 سے زائد علماء نے ایک متفقہ فتویٰ جاری کیا جس میں واضح طور پر کہا گیا کہ خود کش حملے ریاست کے خلاف بغاوت اور انتہا پسندی حرام ہے۔ یہ فتویٰ ایک قومی بیانیہ کے طور پر سامنے آیا۔
پاکستان میں اب ایسے مدارس قائم ہو رہے ہیں جہاں دینی تعلیم کے ساتھ ساتھ جدید مضامین بھی پڑھائے جاتے ہیں۔ اس سے ایک ایسا متوازن نصاب سامنے آ رہا ہے جو طلبہ کو نہ صرف حافظ قرآن اور عالم دین بناتا ہے بلکہ انہیں سائنس اور ٹیکنالوجی کے شعبوں میں بھی با اختیار بناتا ہے۔ اس امتزاج سے ایک نئی نسل تیار ہو رہی ہے جو دین و دنیا دونوں میں رہنمائی فراہم کر سکے گی۔
:رسول اللہ ﷺ نے فرمایا
"خیرکم من تعلم القرآن وعلمه” (صحیح بخاری 5027)
اس حدیث سے واضح ہوتا ہے کہ بہترین انسان وہ ہیں جو قرآن سیکھیں اور دوسروں کو سکھائیں۔
اس مقصد کی تکمیل اسی وقت ممکن ہے جب مدارس کو شدت پسندی سے پاک کر کے انہیں امن و تعلیم کے مراکز بنایا جائے۔ علماء کی اصل ذمہ داری اصلاح، رہنمائی اور خدمت خلق ہے نہ کہ انتشار یا نفرت پھیلانا۔
مدارس کی حرمت کی بحالی کے بعد یہ ادارے ایک مرتبہ پھر قومی یکجہتی اور مذہبی ہم آہنگی کے مراکز ثابت ہو سکتے ہیں۔ اگر مدارس کے فارغ التحصیل طلباء دین کے ساتھ ساتھ دنیاوی علوم میں بھی مہارت حاصل کریں تو وہ ملک کے معاشی، سماجی اور سیاسی نظام کو بہتر بنانے میں کردار ادا کر سکیں گے۔ ایسے علماء معاشرے میں اعتدال، برداشت اور امن کے پرچم بردار ہوں گے۔
پیغام پاکستان دراصل ایک سنگ میل ہے جس نے شدت پسندی کے خلاف قومی اتفاق رائے پیدا کیا۔ اس دستاویز نے واضح کیا کہ اسلام میں خود کش حملے اور بغاوت کی کوئی گنجائش نہیں۔ اس کا اثر نہ صرف اندرون ملک بلکہ بین الاقوامی سطح پر بھی محسوس کیا گیا اور پاکستان کا مثبت تشخص اجاگر ہوا۔ پاکستان کا مستقبل ان مدارس سے جڑا ہے جو نوجوانوں کو نہ صرف مذہبی علوم سکھائیں بلکہ انہیں ایک ذمہ دار شہری اور خدمت خلق کا پیکر بنائیں۔ ایسے مدارس ہی اس قوم کو وہ رہنما فراہم کریں گے جو عالمی سطح پر پاکستان کا مثبت تشخص اجاگر کریں گے۔
مدارس کی حرمت کی بحالی وقت کی اہم ضرورت ہے۔ یہ ادارے جو کبھی علم و حکمت اور امن و محبت کے گہوارے تھے انہیں دوبارہ اسی اصل کی طرف لوٹانا ہوگا۔ قرآن و سنت کی تعلیمات، پیغام پاکستان جیسے قومی بیانیے اور جدید تعلیمی اصلاحات کے ذریعے یہ ممکن ہے کہ مدارس دوبارہ اعتدال، علم اور قومی یکجہتی کے مراکز بن سکیں۔ پاکستان کی ترقی، استحکام اور امن اسی وقت ممکن ہے جب مدارس کو انتہا پسندی کے سائے سے نکال کر علم و اعتدال کے چراغ بنایا جائے۔
اس مضمون میں بیان کردہ خیالات اور آراء خصوصی طور پر مصنف کے ہیں اور پلیٹ فارم کے سرکاری موقف، پالیسیوں یا نقطہ نظر کی عکاسی نہیں کرتے ہیں۔
