وفاقی وزیر مصدق ملک نے ایران کی جانب سے گیس پائپ لائن منصوبہ مکمل نہ کرنے پر پاکستان کو 18 ارب ڈالر ہرجانے کہ خبروں کو بے بنیاد قرار دے دیا۔
قومی اسمبلی میں گفتگو کے دوران مصدق ملک نے 18 ارب ڈالر ہرجانے کے حوالے سے میڈیا میں آنے والی خبروں سے مکمل لاعلمی کا اظہار کیا اور کہا کہ 18 ارب ڈالر کے اعداد و شمار کہاں سے کیسے آئے انہیں معلوم نہیں، وہ متعلقہ شعبے کے وزیر ہیں لیکن ایسی کوئی بات یا نوٹس انکی نظر نہیں گزرا۔
مصدق ملک نے کہا کہ ایران پاکستان گیس پائپ لائن منصوبہ ایک پیچیدہ معاملہ ہے، جس میں ایران پر عائد پابندیوں کا معاملہ بھی شامل ہے، نہ ہی پاکستان اور نہ ہی ایران نے منصوبے کی تکمیل نہ ہونے پر کسی جرمانے کا ابھی تک تخمینہ لگایا ہے، لگتا ہے ہم خود سے ایسی خبریں لگا رہے ہیں جس سے پاکستان کا کوئی فایدہ نہیں، ہمارے ہمسایہ ملک کے ساتھ برادرانہ تعلقات ہیں اسلئے ایسی باتوں سے گریز کرنا چاہیئے۔
مصدق ملک نے قومی اسمبلی میں پیشکش کی کہ اگر ایوان چاہے تو انہیں یا قائمہ کمیٹی کو گیس پائپ لائن منصوبے پر تفصیلی بریفنگ دی جا سکتی ہے تاہم درخواست ہوگی کہ تمام بریفنگ ان کیمرہ رکھی جائے۔
