یکم اکتوبر 2025 کو جنیوا میں اقوام متحدہ کے انسانی حقوق کونسل کے 60 ویں اجلاس کے موقع پر سی اے پی لبرٹی دی ضمیر، ای یو ٹوڈے اور یورپی سہولت پلیٹ فارم (ای ایف پی) کے اشتراک سے ایک سائیڈ ایونٹ منعقد ہوا۔ اس تقریب میں ممبر یورپی پارلیمنٹ باربرا بونٹے اور انا شیفر انووا (ای ایف پی) نے پاکستان پر انسانی حقوق کی مبینہ خلاف ورزیوں کے الزامات لگاتے ہوئے ایک پرانی دستاویزی فلم اور 2012 کے یورپی یونین وائٹ پیپر کا حوالہ دے کر پاکستان کی جی ایس پی پلس حیثیت معطل کرنے کا مطالبہ کیا۔ بظاہر یہ تقریب انسانی حقوق کے عنوان کے تحت تھی مگر اس کے پس پردہ مقاصد سیاسی دکھائی دیتے ہیں۔
یورپی پارلیمنٹ میں پاکستان کے جی ایس پی پلس سٹیٹس پر تنقید نئی بات نہیں۔ ماضی میں بھی ایسے ہی منتخب گروپس پاکستان کے خلاف مہمات چلاتے رہے ہیں جن میں وہی مخصوص نیٹ ورک شامل ہیں جو سیاسی اثر و رسوخ، محدود معلومات اور پرانے الزامات کو بنیاد بنا کر یکطرفہ تاثر قائم کرنے کی کوشش کرتے ہیں۔ جنیوا کا حالیہ سائیڈ ایونٹ بھی اسی روایت کا تسلسل تھا جہاں پرانے مواد اور گمراہ کن بیانیہ کو ازسرنو پیش کیا گیا۔
2012 کے جی ایس پی پلس وائٹ پیپر کا حوالہ دیا گیا جس پر خود یورپی تجزیہ کاروں نے تنقید کی تھی کہ یہ پاکستان کی قانون سازی اور ادارہ جاتی بہتری کو نظر انداز کرتا ہے۔ اسی وائٹ پیپر میں دیگر ممالک کے مقابلے میں پاکستان پر غیر متناسب دباؤ ڈالا گیا جبکہ دیگر مستفید ریاستوں پر یہی معیار لاگو نہیں کیا گیا۔
2012 کے بعد پاکستان نے انسانی حقوق کے شعبے میں نمایاں پیشرفت کی ہے جو کسی بھی ترقی پذیر ملک کے لیے ایک جامع مثال ہے۔ صحافیوں اور میڈیا پروفیشنلز کا تحفظ ایکٹ 2021 صحافیوں کے تحفظ، ان پر تشدد کے انسداد اور تحقیقات کے لیے کمیشنوں کی تشکیل کے لیے منظور کیا گیا۔ اس قانون کے تحت میڈیا ورکرز کے خلاف دھمکیوں یا حملوں کی فوری تحقیقات اور انصاف کو یقینی بنایا جاتا ہے۔
اسی طرح اینٹی ریپ انویسٹیگیشن اینڈ ٹرائل ایکٹ 2021 کے تحت صنفی بنیاد پر جرائم کے خلاف سخت ترین اقدامات متعارف کرائے گئے جن میں فرانزک شواہد، تیز رفتار ٹرائل، سزائے موت اور عمر قید شامل ہیں۔ گھریلو تشدد کے قوانین 2020، 2022 کے ذریعے وفاقی اور صوبائی حکومتوں نے گھریلو تشدد کو جرم قرار دیتے ہوئے متاثرین کے تحفظ، پناہ گاہوں اور قانونی امداد کے نظام بنائے۔
ٹرانس جینڈر افراد کے حقوق کا تحفظ ایکٹ 2018 جنوبی ایشیا میں اپنی نوعیت کی پہلی قانون سازی تھی جس نے صنفی خود شناسی کو قانونی حیثیت دی اور تعلیم، روزگار، صحت تک مساوی رسائی فراہم کی۔ زینب الرٹ ریسپانس اینڈ ریکوری ایکٹ 2020 بچوں کے اغوا کے خلاف فوری ردعمل کا نظام قائم کرتا ہے اور مرکزی ڈیٹا بیس تشکیل دیتا ہے۔
نیشنل کمیشن برائے ہیومن رائٹس (این سی ایچ آر) ایک خودمختار ادارہ ہے جو انسانی حقوق کی خلاف ورزیوں کی تحقیقات کرتا ہے، قوانین کا جائزہ لیتا ہے اور حکومت کو بین الاقوامی کنونشنز کی تعمیل سے متعلق سفارشات دیتا ہے۔ این سی ایچ آر باقاعدگی سے یورپی یونین کے ساتھ رابطے میں رہتا ہے اور پاکستان کی تعمیل کی تصدیق کرتا ہے۔
یہ تمام اصلاحات اس بات کا ثبوت ہیں کہ پاکستان نے انسانی حقوق کے فریم ورک کو مضبوط بنیادوں پر استوار کیا ہے۔
بیرون ملک کچھ تنظیمیں اور افراد انسانی حقوق کی آڑ میں علیحدگی پسند ایجنڈے کو فروغ دیتے ہیں۔ خاص طور پر یورپ میں مقیم چند جلاوطن افراد خود کو ہیومن رائٹس ڈیفینڈرز ظاہر کرتے ہیں جبکہ ان کے روابط ایسے نیٹ ورکس سے منسلک ہوتے ہیں جو پاکستان مخالف تحریکوں کی پشت پناہی کرتے ہیں۔
پاکستان کے سکیورٹی ماہرین کے مطابق یہ نیٹ ورک بعض اوقات دہشت گرد گروپوں کے فرنٹ کے طور پر کام کرتے ہیں۔ انسانی حقوق کی تنظیموں کی آڑ میں یہ پراکسی گروپس ریاستی ردعمل کو محدود کرنے، انسداد دہشتگردی کے اقدامات کو بدنام کرنے اور دنیا میں پاکستان کے امیج کو نقصان پہنچانے کی کوشش کرتے ہیں۔
ماہ رنگ بلوچ جیسی شخصیات کو مغربی پلیٹ فارم پر مظلوم آوازوں کے طور پر پیش کیا جاتا ہے مگر ان کی خاموشی بلوچ لبریشن آرمی (بی ایل اے) اور بلوچستان لبریشن فرنٹ (بی ایل ایف) جیسے دہشت گرد گروہوں کے مظالم پر بہت کچھ ظاہر کرتی ہے۔ یہ وہ تنظیمیں ہیں جنہوں نے سینکڑوں معصوم شہریوں کو نشانہ بنایا اور ترقیاتی منصوبوں، اسکولوں، انفراسٹرکچر پر حملے کیے، مگر مغربی میڈیا اور بعض حقوق گروہ ان کی مذمت سے گریزاں ہیں۔
اسی طرح میمری (MEMRI) جیسے پلیٹ فارمز اور میر یار بلوچ جیسے افراد پاکستان مخالف پروپیگنڈے کا ذریعہ بنے ہوئے ہیں جو بیرونی انٹیلیجنس سپورٹ کے بغیر ممکن نہیں۔ دی ڈپلومیٹ جیسے جریدے نے مارچ سے مئی 2025 کے دوران بلوچستان پر 25 سے زائد مضامین شائع کیے جن میں سے بیشتر غیر متوازن اور یکطرفہ تھے جو منظم لابنگ نیٹ ورک کے اثر و رسوخ کو ظاہر کرتے ہیں۔
پاکستان کے ناقدین خود اپنی ریاستوں میں جاری انسانی حقوق کی سنگین خلاف ورزیوں پر خاموش ہیں۔ ہیومن رائٹس واچ اور ایمنسٹی انٹرنیشنل کی 2019، 2020، 2021 اور 2023 کی رپورٹس میں برطانیہ، فرانس اور جرمنی میں اسلاموفوبیا، نسلی امتیاز، پولیس بربریت اور اقلیتوں پر تشدد کے واقعات کی تفصیلات شامل ہیں۔ اسی طرح امریکہ میں سیاہ فام شہریوں کے خلاف ریاستی تشدد، گوانتانا موبے جیل اور پناہ گزینوں کے ساتھ امتیازی سلوک مغربی ضمیر کے دوہرے معیار کو بے نقاب کرتے ہیں۔
یہی دوہرے معیار پاکستان کے خلاف مہمات کی اصل بنیاد ہیں۔ مغربی لابیز انسانی حقوق کے تصور کو سیاسی مفادات کے حصول کا آلہ بناتی ہیں جبکہ حقیقی وکالت پس پشت چلی جاتی ہے۔
پاکستان کا موقف واضح ہے کہ انسانی حقوق کو سیاسی مفاد کا ہتھیار نہیں بننا چاہیے۔ اسلامی جمہوریہ پاکستان نے اپنے آئین، عدالتی اصلاحات اور قانون سازی کے ذریعے انسانی حقوق کے تحفظ کی ایسی بنیاد رکھی ہے جو خطے کے دیگر ممالک کے لیے مثال بن سکتی ہے۔
یہ درست ہے کہ کسی بھی معاشرے میں بہتری کی گنجائش ہمیشہ موجود رہتی ہے، مگر کسی ملک کی پیشرفت کو نظر انداز کر کے اسے محض سیاسی دباؤ کے لیے استعمال کرنا بین الاقوامی اصولوں کی توہین ہے۔ جنیوا جیسے سائیڈ ایونٹس نہ صرف پاکستان کے قومی مفادات بلکہ انسانی حقوق کے جذبے کو بھی نقصان پہنچاتے ہیں کیونکہ یہ بیانیہ انصاف کے نام پر سیاسی اجارہ داری کو فروغ دیتا ہے۔
پاکستان کا مشاہدہ یہی ہے کہ انسانی حقوق جب انسانی بھلائی کے لیے استعمال ہوں تو وہ کسی بھی قوم کی اصل قوت بن جاتے ہیں، اور پاکستان اسی اصول پر کاربند ہے۔
اس مضمون میں بیان کردہ خیالات اور آراء خصوصی طور پر مصنف کے ہیں اور پلیٹ فارم کے سرکاری موقف، پالیسیوں یا نقطہ نظر کی عکاسی نہیں کرتے ہیں۔
