لاہور کراچی اسلام آباد کے چیمبرز آف کامرس سمیت ملک بھر کے تاجروں اور صنعتکاروں نے شنگھائی تعاون تنظیم (ایس سی او) کے سربراہ اجلاس کے موقع پر پاکستان تحریک انصاف (پی ٹی آئی) کی احتجاج کی کال پر شدید تحفظات کا اظہار کرتے ہوئے تحریک انصاف کی قیادت سے فیصلے پر نظرثانی کا مطالبہ کیا ہے۔
واضح رہے کہ پاکستان تحریک انصاف نے پنجاب بھر میں اپنے احتجاجی مظاہروں کو مؤخر کرتے ہوئے ملک بھر سے پارٹی قیادت اور کارکنوں کو 15 اکتوبر کو اسلام آباد میں احتجاج کیلئے پہنچنے کی کال دے رکھی ہے، تحریک انصاف نے اڈیالہ جیل میں قید اپنے بانی چیئرمین عمران خان سے پارٹی رہنماؤں اور اہلخانہ کی ملاقات کرانے کا مطالبہ بھی کر رکھا ہے۔
تاجروں اور صنعتکاروں نے ایس سی او کانفرنس کے موقع پر پی ٹی آئی کی احتجاج کی کال کو تنقید کا نشانہ بناتے ہوئے تباہ کن قرار دے دیا ہے اور اس کے نتیجے میں معاشی عدم استحکام اور پاکستان کی عالمی ساکھ کو پہنچنے والے نقصان پر تشویش کا اظہار کیا۔
اسلام آباد کی تاجر برادری کا کہنا ہے کہ ایس سی او کانفرنس علاقائی تجارت کے فروغ کا اہم ذریعہ ہے اور امید ہےکہ تحریک انصاف ملک کے وسیع تر مفاد کو مدنظر رکھتے ہوئے اپنے فیصلے پر نظرثانی کرے گی۔
ماہر معیشت ڈاکٹر نور فاطمہ نے کہا کہ پی ٹی آئی کا یہ اقدام عالمی برادری میں پاکستان کی ساکھ کو کمزور کرے گا، ہمیں سیاست چمکانے کے بجائے معاشی سفارتکاری پر توجہ دینے کی ضرورت ہے۔
معروف کاروباری شخصیت مرزا اختیار بیگ نے کہا ہے کہ یہ کانفرنس علاقائی ممالک کے ساتھ ہمارے تعلقات کو توانا کرنے کا اہم موقع ہے، پی ٹی آئی کی احتجاج کی کال اس پلیٹ فارم سے مستفید ہونے کے امکانات کو خطرے میں ڈال سکتی ہے، ایس سی او کانفرنس پاکستان کی معاشی بحالی کے لیے اہم ہے جبکہ پی ٹی آئی کی احتجاج کی کال صرف عدم استحکام اور غیر ملکی سرمایہ کاروں کو روکنے کا سبب بنے گی۔
تاجر و صنعتکار برادری نے پی ٹی آئی سے حوصلے اور تدبر سے کام لینے کا مطالبہ کرتے ہوئے کہا ہے کہ قومی ایشوز کو بھی سیاست کی بھینٹ چڑھانا انتہائی افسوس ناک ہو گا، انہوں نے 15 اکتوبر کو ڈی چوک پر احتجاج کی کال واپس لینے کا مطالبہ کیا ہے تاکہ ملک معاشی استحکام پر توجہ مرکوز کر سکے، تاجروں اور صنعت کاروں کا کہنا ہے کہ یہ تقسیم کی سیاست کا نہیں بلکہ ملک کی اقتصادی صلاحیت پر توجہ دینے اور دوسرے ممالک کے ساتھ تجارت بڑھانے کا وقت ہے۔
اسلام آباد کے ایک تاجر نے کہا کہ اس وقت ملک کو سیاسی تقسیم کے بجائے اپنی معاشی صلاحیت دکھانے کی ضرورت ہے، پی ٹی آئی کو ملک کے معاشی مفادات کو ترجیح دینی چاہیے۔
لاہور کے ایک تاجر نے کہا کہ ایس سی او کانفرس علاقائی تجارت کے لیے اہم ہے، پی ٹی آئی کی احتجاج کی کال بات چیت میں خلل ڈال سکتی ہے اور ملکی معاشی مسائل کے حل کیلئے دور رس پیش رفت میں رکاوٹ بن سکتی ہے۔
کراچی چیمبر آف کامرس اینڈ انڈسٹری کے صدر محمد فہیم نے کہا کہ پی ٹی آئی کی احتجاج کی کال نے تاجروں میں بےیقینی پیدا کردی ہے، ہم اپنے کاروبار پر اس کے اثرات کے حوالے سے فکر مند ہے۔
کراچی ہول سیل مارکیٹ کے تاجر جمیل پراچہ نے کہا کہ یہ سیاست کرنے کے بجائے استحکام لاکر معیشت کو فروغ دینے کا وقت ہے۔
لاہور چیمبر آف کامرس اینڈ انڈسٹری کے صدر خواجہ شہباز نے بھی پی ٹی آئی سے احتجاج کے فیصلے پر نظرثانی کا مطالبہ کرتے ہوئے کہا ہے کہ ہمارے کاروبار مزید عدم استحکام کے متحمل نہیں ہیں۔
اسلام آباد ویمن چیمبر آف کامرس اینڈ انڈسٹری کی صدر عائشہ خرم نے کہا کہ ہمیں سیاسی مفادات کے بجائے معاشی ترقی کو ترجیح دینے کی ضرورت ہے۔
