افغانستان کے شمالی علاقوں میں پیر کی صبح 6.3 شدت کا طاقتور زلزلہ آیا جس کے نتیجے میں کم از کم 20 افراد جاں بحق اور 320 سے زائد زخمی ہو گئے۔ مقامی حکام کے مطابق زلزلہ مزار شریف کے قریب آیا جو افغانستان کے بڑے شہروں میں سے ایک ہے۔
امریکی جیولوجیکل سروے (یو ایس جی ایس) کے مطابق زلزلے کی گہرائی 28 کلومیٹر (17 میل) ریکارڈ کی گئی اور اس نے نارنجی الرٹ جاری کیا، جس میں بھاری جانی نقصان کے خدشے کا اظہار کیا گیا۔ جھٹکے بلخ اور سمنگان صوبوں میں محسوس کیے گئے، جس کے باعث لوگ خوفزدہ ہو کر گھروں سے باہر نکل آئے۔
طالبان کی وزارت صحت کے ترجمان شرفات زمان عمار نے بتایا کہ ہلاکتوں میں مزید اضافے کا خدشہ ہے کیونکہ امدادی کارروائیاں جاری ہیں۔ صوبائی حکام کے مطابق کئی علاقوں میں عمارتوں کو شدید نقصان پہنچا ہے جبکہ زیادہ تر زخمی اس وقت ہوئے جب لوگ عمارتوں سے چھلانگ لگا کر بچنے کی کوشش کر رہے تھے۔
سوشل میڈیا پر طالبان حکام کی جانب سے شیئر کی گئی ویڈیوز میں مزار شریف کی تاریخی نیلی مسجد کے گرد ملبہ بکھرا دکھائی دیتا ہے، جو اہل تشیع کے نزدیک ایک مقدس مقام ہے اور کہا جاتا ہے کہ یہاں پہلے امام کا مزار واقع ہے۔
سمنگان صوبے میں بھی جانی نقصان کی اطلاعات ہیں جبکہ کابل میں طالبان پولیس کے مطابق وہ صورت حال پر قریبی نظر رکھے ہوئے ہیں۔
یہ زلزلہ اگست میں آنے والے 6.0 شدت کے زلزلے کے بعد آیا ہے جس میں ایک ہزار سے زائد افراد ہلاک ہوئے تھے۔ افغانستان اپنی جغرافیائی پوزیشن کے باعث زلزلوں کے لیے نہایت حساس ملک ہے کیونکہ یہ ان خطوں میں واقع ہے جہاں بھارتی اور یوریشین پلیٹس آپس میں ٹکراتی ہیں۔
امدادی ٹیمیں اب ملبے تلے دبے افراد کو نکالنے کے لیے دن رات کام کر رہی ہیں جبکہ مزید آفٹر شاکس کے خدشات بھی ظاہر کیے جا رہے ہیں۔
