پاکستان نے گزشتہ دو دہائیوں میں دہشت گردی کے خلاف ناقابل فراموش قربانیاں دی ہیں۔ لاکھوں جانیں ضائع ہوئیں۔ اربوں ڈالر کا نقصان برداشت کیا گیا۔ مگر ریاست پاکستان نے امن کے قیام کی کوششیں جاری رکھیں۔ تاہم حالیہ برسوں میں ایک نیا تشویشناک رجحان سامنے آیا ہے۔ افغانستان کی سرزمین اور افغان شہریوں کی براہ راست شمولیت۔ 19 اکتوبر کو باجوڑ میں ہونے والی ایک کارروائی نے اس رجحان کو ٹھوس شواہد کے ساتھ بے نقاب کر دیا۔
باجوڑ ضلع میں سکیورٹی فورسز نے دہشت گرد تنظیم تحریک طالبان پاکستان (ٹی ٹی پی) کے خلاف کامیاب کارروائی کی۔ جس میں چار عسکریت پسند ہلاک ہوئے۔ حیران کن طور پر ان میں سے تین دہشت گرد افغان شہری نکلے۔
یہ اعداد و شمار ظاہر کرتے ہیں کہ ہلاک ہونے والے عسکریت پسندوں کا 75 فیصد حصہ افغان قومیت سے تعلق رکھتا تھا۔
اس انکشاف نے ثابت کر دیا کہ پاکستان میں سرگرم دہشت گرد گروہوں کا بڑا حصہ اب افغانستان سے منسلک عناصر پر مشتمل ہے۔
ہلاک دہشت گردوں میں سے ایک کی شناخت ملا صدام عرف حذیفہ کے طور پر ہوئی۔ جو افغانستان کے صوبہ قندوز کے رہائشی عبدالباقی کا بیٹا تھا۔ اس کے جنازے اور تعزیتی تقاریب افغان سوشل میڈیا اکاؤنٹس کے ذریعے وائرل ہوئیں۔
مزید تشویش ناک بات یہ ہے کہ ملا صدام کی تعزیتی تقریب جامع مسجد خامہ کاری قندوز میں منعقد ہوئی۔ جب کہ دوسری تقریب فرانس کے شہر رینس میں مسجد عطاقوا میں 26 اکتوبر کو رکھی گئی۔
یہ تقاریب واضح کرتی ہیں کہ نہ صرف افغانستان بلکہ یورپ میں آباد افغان کمیونٹی بھی ایک ایسے دہشت گرد کی یاد منانے میں شریک ہوئی جو پاکستان کے خلاف جنگ میں مارا گیا تھا۔
یہ امر حیران کن اور خطرناک ہے کہ فرانس جیسے جدید اور امن پسند معاشرے میں بھی افغان نژاد افراد نے ایک دہشت گرد کی ’’بڑائی‘‘ کو مذہبی عمل کے طور پر پیش کیا۔
یہ رویہ بتاتا ہے کہ افغان معاشرہ دہشت گردی کو معمول کا عمل سمجھنے لگا ہے۔
فرانس میں ہونے والی تقریب کے منتظمین سے رابطے کے لیے دیے گئے فون نمبرز (+33.758.254.892، +33.688.004.738 اور 06.49.51.97.21) واضح کرتے ہیں کہ یہ کوئی انفرادی عمل نہیں بلکہ منظم نیٹ ورک کا حصہ ہے۔
جب فرانس میں تقریب کی تصاویر وائرل ہوئیں تو پوسٹ کرنے والے افراد نے حکومتی ردعمل کے خوف سے فوراً پوسٹیں حذف کر دیں۔
یہ اس بات کا ثبوت ہے کہ یورپی ممالک میں موجود بعض افغان شہری نہ صرف نظریاتی طور پر انتہا پسند ہیں بلکہ وہ دہشت گردی کے حامی بیانیے کو مساجد کے ذریعے فروغ دے رہے ہیں۔
یہ صورتحال فرانس اور یورپی یونین کے لیے بھی لمحہ فکریہ ہے کہ ان کے معاشروں میں دہشت گردی کے حامی عناصر کس طرح مذہبی پلیٹ فارم استعمال کر رہے ہیں۔
پاکستانی حکومت کو چاہیے کہ وہ فرانس اور دیگر متعلقہ ممالک سے باضابطہ طور پر یہ معاملہ اٹھائے۔ تاکہ ایسے افراد کے خلاف قانونی کارروائی کی جا سکے جو دہشت گردوں کی تعریف اور حمایت کرتے ہیں۔
یہ مسئلہ صرف سکیورٹی کا نہیں بلکہ ایک بین الاقوامی اخلاقی چیلنج بھی ہے، جسے عالمی ضمیر کے سامنے رکھا جانا چاہیے۔
پاکستان میں دہشت گردی میں افغان مداخلت کے واضح شواہد کے باوجود افغان طالبان حکومت مسلسل اس کی تردید کرتی ہے۔ وہ دعویٰ کرتے ہیں کہ پاکستان میں ہونے والے واقعات “اندرونی مسئلے” ہیں۔ مگر اعداد و شمار اس بیانیے کو رد کرتے ہیں۔
2021 میں طالبان کے دوبارہ اقتدار میں آنے کے بعد سے پاکستان کے اندر دہشت گردی کی کارروائیوں میں تیزی سے اضافہ ہوا ہے۔
صرف اپریل تا ستمبر 2025 کے درمیان، 267 افغان شہری دہشت گرد کارروائیوں میں ملوث یا ہلاک ہوئے۔ جن کی شناخت نام اور پتے کے ساتھ ہوئی۔
ماہرین کے مطابق اصل تعداد اس سے کہیں زیادہ ہے۔ کیونکہ 70 تا 80 فیصد سرحد پار درانداز افغان شہری ہیں۔
افغان صوبوں نورستان، کنڑ، ننگرہار، پکتیا، خوست اور پکتیکا میں 60 سے زائد ٹی ٹی پی کیمپ سرگرم ہیں۔
یہ کیمپ تربیت، اسلحہ اور لاجسٹک مدد فراہم کرتے ہیں۔
خفیہ اطلاعات کے مطابق ٹی ٹی پی کا سربراہ نور ولی محسود کابل میں طالبان کے تحفظ میں رہتا ہے۔ جہاں اسے ماہانہ 43,000 امریکی ڈالر وظیفہ دیا جاتا ہے۔
یہ رقم نہ صرف طالبان حکومت کی جانب سے “غیر اعلانیہ حمایت” کو ظاہر کرتی ہے بلکہ سرحد پار حملوں میں براہ راست شمولیت کو بھی ظاہر کرتی ہے۔
مئی 2025 میں جاری ہونے والی یو این سکیورٹی کونسل مانیٹرنگ رپورٹ (UNSC 36th Report) نے طالبان کی دہشت گردی سے وابستگی کی بین الاقوامی تصدیق کر دی۔
رپورٹ کے مطابق افغانستان میں مختلف دہشت گرد گروہ بشمول تحریک طالبان پاکستان، داعش خراسان، القاعدہ، ایسٹ ترکستان اسلامک موومنٹ اور ترکستان اسلامک پارٹی طالبان حکومت کی ملی بھگت سے آزادانہ طور پر کام کر رہے ہیں۔
ٹی ٹی پی کے پاس تقریباً 6,000 دہشت گردوں پر مشتمل فورس ہے، جسے افغان حکام سے جدید اسلحہ اور مالی مدد مل رہی ہے۔
رپورٹ یہ بھی ظاہر کرتی ہے کہ ٹی ٹی پی اور داعش خراسان کے درمیان حکمت عملی کی سطح پر ہم آہنگی بڑھ رہی ہے۔ دونوں تنظیمیں انٹیلی جنس، عسکری معلومات اور حتیٰ کہ مشترکہ اہداف بھی بانٹتی ہیں۔
تجزیہ کار اب انہیں “ایک ہی سکے کے دو رُخ” قرار دیتے ہیں۔
اقوام متحدہ کی رپورٹ کے مطابق، بلوچستان لبریشن آرمی (BLA)، خصوصاً اس کی مجید بریگیڈ، جنوبی افغانستان میں ٹی ٹی پی کے ساتھ قریبی تعلقات رکھتی ہے۔
دونوں گروہ والیکوٹ اور شورابک جیسے علاقوں میں مشترکہ تربیتی کیمپ چلاتے ہیں۔
ان کی نظریاتی اور عسکری تربیت میں القاعدہ کلیدی کردار ادا کر رہی ہے۔ جو خطے میں دہشت گرد نیٹ ورکس کے باہمی روابط کو مزید مضبوط بنا رہی ہے۔
برصغیر میں القاعدہ کے دہشت گرد غزنی، ہلمند، قندھار، کنڑ، اروزگان اور زابل جیسے افغان صوبوں میں سرگرم ہیں۔
یہ گروہ نہ صرف القاعدہ بلکہ ٹی ٹی پی کے عسکریت پسندوں کو بھی تربیت دیتا ہے۔ جس سے مختلف دہشت گرد نیٹ ورکس کے درمیان حدیں دھندلی ہو چکی ہیں۔
یہ وہی صورتحال ہے جس کا خدشہ عالمی ماہرین سلامتی پہلے ہی ظاہر کر چکے تھے کہ افغانستان ایک بار پھر عالمی دہشت گردی کے مرکز میں تبدیل ہو رہا ہے۔
اقوام متحدہ کی رپورٹ واضح کرتی ہے کہ افغان طالبان کی جانب سے اپنی سرزمین کو سرحد پار دہشت گردی کے لیے استعمال ہونے سے روکنے میں ناکامی دوحہ معاہدے کی کھلی خلاف ورزی ہے۔
طالبان نے دوحہ میں وعدہ کیا تھا کہ وہ اپنی زمین کسی دوسرے ملک کے خلاف استعمال نہیں ہونے دیں گے۔
مگر عملی طور پر افغانستان ایک ایسے غیر سرکاری دہشت گرد اتحاد میں تبدیل ہو چکا ہے جہاں مختلف گروہ مشترکہ طور پر پاکستان کے خلاف سرگرم ہیں۔
پاکستان کو اس صورتحال سے نمٹنے کے لیے سفارتی، عسکری اور انٹیلی جنس سطح پر مربوط حکمت عملی اپنانی ہوگی۔
افغان حکومت کے انکار یا تاویلوں کے باوجود، زمینی حقائق یہی بتاتے ہیں کہ پاکستان کے خلاف دہشت گردی اب ایک منظم سرحد پار مہم کی شکل اختیار کر چکی ہے۔
اس کے سدباب کے لیے پاکستان کو نہ صرف عالمی فورمز پر مؤقف اجاگر کرنا ہوگا بلکہ بارڈر مینجمنٹ، خفیہ معلومات کے تبادلے اور انسدادِ دہشت گردی اقدامات میں بھی شراکت داری کو بڑھانا ہوگا۔
اس مضمون میں بیان کردہ خیالات اور آراء خصوصی طور پر مصنف کے ہیں اور پلیٹ فارم کے سرکاری موقف، پالیسیوں یا نقطہ نظر کی عکاسی نہیں کرتے ہیں۔
