جنگ اور جیو نیوز کے اسلام آباد میں سینئر رپورٹر اعزاز سید کے یو ٹیوب چینل ٹاک شوک میں گفتگو کرتے ہوئے وفاقی دارالحکومت کے باخبر ترین صحافیوں میں شامل سینئر رپورٹر آصف بشیر چوہدری نے دعویٰ کیا ہے کہ اسٹیبلشمنٹ کی طرف سے بانی پی ٹی آئی عمران خان کو اڈیالہ جیل میں یہ پیغام پہنچایا گیا ہے کہ 16 اکتوبر سے پہلے وفاقی دارالحکومت میں ایسے کسی احتجاج کو برداشت نہیں کیا جائے گا جس کا مظاہرہ پی ٹی آئی اور گنڈا پور حکومت کل سے کر رہی ہے اور اگر پی ٹی آئی باز نہ آئی تو رویہ کے پھر سنگین نتائج ہونگے۔
آصف بشیر چوہدری کا کہنا ہے کہ یہ دوٹوک وارننگ ملنے کے بعد بانی پی ٹی آئی کو 4 اکتوبر سے شروع کیا گیا یہ احتجاج ملتوی کرنے کیلئے کسی فیس سیونگ کی تلاش ہے جو تاحال انہیں مل نہیں رہی، اس موقع پر گفتگو کرتے ہوئے پروگرام کے میزبان اعزاز سید نے کہا کہ اس بات کی سمجھ نہیں آ رہی کہ بانی پی ٹی آئی اور پی ٹی آئی کو چین، سی پیک اور چین کی قیادت سے دشمنی کیا ہے، پی ٹی آئی نے 2014ء بھی ڈی چوک میں اس وقت طویل دھرنا دے دیا تھا کہ جب چین کے صدر سی پیک کے افتتاح کیلئے پاکستان کے دورے پر آنا چاہتے تھے، اب چین کے وزیراعظم شنگھائی تعاون تنظیم کے سربراہ اجلاس میں شرکت کیلئے آ رہے ہیں تو عمران خان اور پی ٹی آئی نے ایک بار پھر ڈی چوک میں دھرنے کا اعلان کر دیا ہے اور پچھلے 24 گھنٹے سے جڑواں شہروں کو یرغمال بنا رکھا ہے۔
اسٹیبلشمنٹ کی طرف سے دی گئی وارننگ کے حوالے سے آصف بشیر چوہدری نے یہ دعویٰ بھی کیا ہے کہ بانی پی ٹی آئی اگلے 24 سے 48 گھنٹوں میں یہ احتجاجی مارچ اور دھرنا ختم کرنے جس اعلان کر سکتے ہیں اگر انہوں نے ہٹ دھرمی سے کام لیا تو خیبرپختونخوا کی حکومت کے ساتھ ساتھ انہیں اپنی جماعت کے ایک بڑھے دھڑے سے بھی ہاتھ دھونے پڑ سکتے ہیں جس کے اسٹیبلشمنٹ کے ساتھ پس پردہ اچھے تعلقات اور رابطے ہیں۔
