5 اگست 2019 کو بھارتی حکومت نے ایک غیر متوقع اور متنازع اقدام کے ذریعے جموں و کشمیر کی خصوصی آئینی حیثیت کو ختم کرتے ہوئے آرٹیکل 370 اور 35 اے کو منسوخ کر دیا۔ اس کے ساتھ ہی ریاست کو دو مرکزی زیر انتظام علاقوں میں تقسیم کر دیا گیا۔ اس فیصلے کو کشمیری عوام، حزب اختلاف، انسانی حقوق کی تنظیموں اور آئینی ماہرین کی بڑی تعداد نے غیر آئینی اور غیر جمہوری قرار دیا۔ کانگریس، جو بھارت کی سب سے بڑی اور پرانی جماعت ہے، اب اس کے خلاف میدان میں آچکی ہے۔
کانگریس نے حالیہ دنوں میں جموں و کشمیر میں 21 روزہ احتجاجی مہم اور 16 دن طویل بھوک ہڑتال کا اعلان کیا۔ اس کا مقصد صرف سیاسی اسکورنگ نہیں بلکہ جموں و کشمیر کے عوام کے آئینی، جمہوری اور انسانی حقوق کے تحفظ کا پیغام دینا تھا۔ ہماری ریاست، ہمارا حق کے نعرے کے تحت چلائی جانے والی یہ مہم ریاستی حیثیت کی بحالی، آرٹیکل 370 کی واپسی اور خطے کی خودمختاری کی بحالی کے مطالبات پر مبنی ہے۔
5 اگست کو کانگریس نے یوم سیاہ کے طور پر منایا۔ جس میں سیاہ پٹیاں، بینرز، احتجاجی مظاہرے اور سوشل میڈیا پر مہمات کے ذریعے یہ پیغام دیا گیا کہ کشمیریوں کی خودمختاری چھیننا آئینی دھوکہ تھا۔ کانگریس کا موقف ہے کہ یہ دن نہ صرف کشمیریوں کے لیے بلکہ بھارتی جمہوریت کے لیے بھی تاریک دن تھا۔
بی جے پی نے کانگریس کی اس مہم کو سیاسی ڈرامہ اور نمائشی احتجاج قرار دیا۔ وزیر داخلہ اور بی جے پی کے رہنماؤں نے دعویٰ کیا کہ 2019 کا اقدام خطے میں ترقی اور امن کا باعث بنا ہے۔ تاہم، زمینی حقائق کچھ اور کہانی سناتے ہیں۔ نہ صرف ریاستی حیثیت کی بحالی کا وعدہ پورا نہیں ہوا بلکہ آج تک جموں و کشمیر میں اسمبلی انتخابات بھی منعقد نہیں کیے گئے۔
بی جے پی نے بھوک ہڑتال کا مذاق اڑاتے ہوئے "فٹ انڈیا، ہٹ انڈیا” جیسے نعرے گھڑے جو سیاسی سنجیدگی سے زیادہ توہین آمیز رویے کی عکاسی کرتے ہیں۔ یہ بات بھی قابل غور ہے کہ 2014 کے انتخابی منشور میں بی جے پی نے ریاستی حیثیت کی بحالی کا وعدہ کیا تھا جو آج تک وفا نہیں ہو سکا۔ بی جے پی رہنما الطاف ٹھاکر کی طرف سے کانگریس رہنما طارق کرا پر ذاتی حملے یہ ظاہر کرتے ہیں کہ یہ احتجاج بی جے پی کے لیے پریشانی کا باعث بن رہا ہے۔
کانگریس نے چائے پر چرچا جیسے عوامی اقدامات کے ذریعے عام لوگوں، ٹرانسپورٹرز، تاجروں، طلبہ اور سول سوسائٹی کو شامل کرنے کی کوشش کی ہے۔ یہ تبدیلی اس بات کی علامت ہے کہ کانگریس اب صرف ایلیٹ سطح پر سیاست نہیں کر رہی بلکہ نچلی سطح پر جا کر عوامی آواز بننے کی کوشش کر رہی ہے۔
ریاستی حیثیت کی بحالی اور آرٹیکل 370 کی واپسی صرف سیاسی مطالبے نہیں بلکہ یہ جموں و کشمیر کے عوام کی شناخت، ثقافت، خودمختاری اور تاریخی حیثیت سے وابستہ مسائل ہیں۔ جب تک یہ حقوق واپس نہیں کیے جاتے خطے میں مکمل امن اور سیاسی استحکام ممکن نہیں۔ کانگریس اسی بنیاد پر ان مطالبات کو جمہوریت کی بحالی سے تعبیر کرتی ہے۔
اگرچہ بھارتی حکومت کشمیر کو اندرونی معاملہ قرار دیتی ہے مگر بین الاقوامی سطح پر یہ معاملہ اب بھی زیر بحث ہے۔ اقوامِ متحدہ کی قراردادیں، انسانی حقوق کی رپورٹس، یورپی یونین اور او آئی سی جیسے اداروں کی تشویش اس بات کی دلیل ہے کہ جموں و کشمیر کا مسئلہ عالمی اہمیت رکھتا ہے۔ بھارت کے اندرونی بیانیے سے باہر ایک مضبوط عالمی دباؤ موجود ہے جسے نظرانداز نہیں کیا جا سکتا۔
ایک طرف بی جے پی ترقی اور حالات معمول پر آنے کا دعویٰ کرتی ہے لیکن دوسری طرف اب تک وہاں اسمبلی انتخابات نہیں کروائے گئے۔ یہ جمہوریت کی بنیادی نفی ہے۔ کانگریس اس نکتے پر بھی زور دے رہی ہے کہ اگر واقعی حالات معمول پر ہیں تو جموں و کشمیر میں جمہوری عمل کیوں بحال نہیں کیا جا رہا؟
کانگریس کو اس احتجاج کو وقتی مہم تک محدود نہیں رکھنا چاہیے۔ اسے چاہیے کہ وہ جموں و کشمیر کی دیگر اہم جماعتوں جیسے نیشنل کانفرنس، پی ڈی پی، نیشنل پارٹی اور سول سوسائٹی کو ساتھ ملا کر ایک بڑا سیاسی محاذ بنائے۔ صرف ایک جماعت کی آواز محدود اثر رکھتی ہے لیکن اگر مشترکہ آواز اٹھائی جائے تو یہ دباؤ بہت زیادہ مؤثر ہو سکتا ہے۔
یہ بات واضح ہے کہ مسئلہ صرف ریاستی حیثیت کا نہیں بلکہ کشمیری عوام کے حقِ خودارادیت کا ہے۔ اقوامِ متحدہ کی قراردادیں آج بھی موثر ہیں اور بھارت ایک جمہوری ریاست ہونے کے ناطے اس سے انکار نہیں کر سکتا۔ ریاستی حیثیت کی بحالی محض پہلا قدم ہوگا، اصل حل اقوامِ متحدہ کی قراردادوں کے مطابق حقِ خودارادیت کے نفاذ سے مشروط ہے۔
کانگریس کی حالیہ مہم اور بھوک ہڑتال جموں و کشمیر کے سیاسی منظرنامے میں نئی روح پھونکنے کی کوشش ہے۔ اگر یہ مہم خلوص، مستقل مزاجی اور وسیع تر اتحاد کے ساتھ جاری رکھی گئی تو یہ نہ صرف بی جے پی کے یکطرفہ بیانیے کو چیلنج کرے گی بلکہ خطے میں آئینی، جمہوری اور انسانی حقوق کی بحالی کی راہ بھی ہموار کر سکتی ہے۔
اب وقت آ چکا ہے کہ جموں و کشمیر کے عوام کو ان کا حق دیا جائے۔ وہ حق جو 2019 میں ان سے چھینا گیا اور جس کی بحالی آج بھی مشترکہ قومی و انسانی فریضہ ہے۔
اعلان دستبرداری: اس مضمون میں بیان کردہ خیالات اور آراء خصوصی طور پر مصنف کے ہیں اور پلیٹ فارم کے سرکاری موقف، پالیسیوں یا نقطہ نظر کی عکاسی نہیں کرتے ہیں۔
