انٹرنیشنل کرکٹ کونسل (آئی سی سی) نے ویمنز کرکٹ ورلڈ کپ کے لیے ٹکٹوں کی فروخت کے شیڈول اور افتتاحی تقریب کی جھلکیاں جاری کر دی ہیں۔
ذرائع کے مطابق عالمی شہرت یافتہ بھارتی گلوکارہ شریا گھوشل اس سال کی افتتاحی تقریب میں اپنی مسحور کن آواز سے شائقین کو محظوظ کریں گی۔
یہ میگا ایونٹ بھارت کے چار بڑے شہروں کے علاوہ سری لنکا کے دارالحکومت کولمبو میں بھی کھیلا جائے گا۔ یوں تماشائیوں کو صرف کرکٹ ہی نہیں بلکہ ثقافت، فن اور موسیقی کے امتزاج سے بھی روشناس کرایا جائے گا۔
افتتاحی میچ بھارت اور سری لنکا کے درمیان گوہاٹی میں کھیلا جائے گا، جبکہ اس سے قبل شریا گھوشل کی پرفارمنس تقریب کو چار چاند لگا دے گی۔ اس موقع پر خصوصی لائٹس، ویژول ایفیکٹس اور تھیمیٹک سرگرمیوں کا اہتمام بھی ہوگا تاکہ تقریب کو یادگار بنایا جا سکے۔
شائقین کے لیے سب سے بڑی خوشخبری یہ ہے کہ رواں ورلڈ کپ کی ٹکٹیں انتہائی کم قیمت پر دستیاب ہوں گی۔ بھارت میں لیگ میچز کے ٹکٹ محض 100 روپے سے شروع ہوں گے، جو آئی سی سی ایونٹس کی تاریخ میں سب سے کم قیمت ہے۔ اس اقدام کا مقصد زیادہ سے زیادہ تماشائیوں کو اسٹیڈیمز تک لانا اور ویمنز کرکٹ کے فروغ کو یقینی بنانا ہے۔
ٹکٹوں کی فروخت کا آغاز گزشتہ روز ہو چکا ہے۔ پہلے مرحلے میں چار روزہ خصوصی پری سیل ونڈو صرف گوگل پے صارفین کے لیے مختص کی گئی ہے، جو 8 ستمبر شام 7 بجے تک ٹکٹ خرید سکتے ہیں۔
دوسرے مرحلے میں عام فروخت 9 ستمبر رات 8 بجے سے شروع ہوگی، جہاں باقی شائقین بھی آسانی سے اپنی نشست محفوظ کر سکیں گے۔ ابتدائی طور پر راؤنڈ رابن میچز کے ٹکٹ دستیاب ہوں گے، جبکہ اگلے مرحلے میں مزید میچز شامل کیے جائیں گے۔
ویمنز ورلڈ کپ کی تازہ ترین اپ ڈیٹس اور تفصیلات کے لیے آپ nigah.pk پر بھی وزٹ کر سکتے ہیں۔
