پاکستان کی معیشت، معاشرت اور سلامتی کا دارومدار جس بنیاد پر کھڑا ہے وہ پانی ہے ایک ایسا قدرتی وسیلہ جو زرعی پیداوار، توانائی کے نظام، انسانی زندگی اور ماحولیاتی توازن کا ضامن ہے۔ تاہم بدلتے ہوئے موسمی حالات، بھارت کی اپ سٹریم خلاف ورزیوں اور اندرونی سطح پر انتظامی کمزوریوں نے پاکستان کی آبی سلامتی کو سنگین خطرات سے دو چار کر دیا ہے۔ نچلے دریائی ملک کے طور پر پاکستان کو ان چیلنجز کا سامنا ہے جو معیشت اور مستقبل کی نسلوں کی بقا سے جڑے ہیں۔ گزشتہ دو دہائیوں کے دوران پاکستان نے گلیشیئرز کے تیزی سے پگھلنے، غیر متوقع بارشوں اور خشک سالی کا سامنا کیا ہے۔ اقوام متحدہ کی رپورٹوں کے مطابق پاکستان ان ممالک میں شامل ہے جو کلائمیٹ رسک انڈیکس میں انتہائی خطرناک سطح پر ہیں۔ شمالی علاقوں میں گلیشیئرز کے تیز پگھلاؤ سے وقتی طور پر سیلابی خطرات بڑھ جاتے ہیں جبکہ طویل المدتی اثرات کے طور پر دریاؤں کے بہاؤ میں کمی متوقع ہے۔ اسی طرح غیر متوازن مون سون پیٹرن نے زرعی معیشت پر براہ راست اثر ڈالا ہے۔ ان خطرات کے پس منظر میں پاکستان کو آبی نظم و نسق کے لیے ایک جامع سائنسی اور پائیدار حکمت عملی کی ضرورت ہے یہی وہ نکتہ ہے جہاں سے پانی کی موجودگی قومی سلامتی کے برابر اہمیت اختیار کر چکی ہے۔
پاکستان اور بھارت کے درمیان 1960 کا انڈس واٹر ٹریٹی جنوبی ایشیا میں پانی کی منصفانہ تقسیم کا تاریخی معاہدہ ہے تاہم بھارت کی جانب سے اپ سٹریم دریاؤں پر ڈیموں اور منصوبوں کی تعمیر اس معاہدے کی روح کے خلاف ہے۔ کشن گنگا، رتلے اور بگلیہار جیسے منصوبوں نے نہ صرف سندھ بیسن کے قدرتی بہاؤ کو متاثر کیا ہے بلکہ پاکستان کے زرعی خطوں خاص طور پر جنوبی پنجاب اور سندھ میں پانی کی قلت بڑھا دی ہے۔ پاکستان کا موقف واضح ہے کہ پانی مشترکہ قدرتی امانت ہے، اسی لیے پاکستان نے اقوام متحدہ اور عالمی بینک کے فورمز پر بارہا زور دیا کہ بھارت کی یہ اپ سٹریم خلاف ورزیاں علاقائی امن کے لیے خطرہ ہیں۔ پاکستان کے آبی مسائل کا ایک پہلو اندرونی کمزور حکمرانی سے بھی جڑا ہے۔ پانی کے ذخائر کی گنجائش ناکافی ہے، آبپاشی کے پرانے نظام میں ضیاع کی شرح 35 سے 40 فیصد تک ہے جبکہ واٹر پالیسیوں کا نفاذ صوبائی اختلافات میں الجھا رہتا ہے۔ ماہرین کے مطابق اگر پاکستان نے موثر آبی اصلاحات نہ کیں تو 2040 تک ملک پانی کی شدید قلت والے خطے میں داخل ہو سکتا ہے۔
اسی تناظر میں حکومت پاکستان نے نیشنل واٹر پالیسی 2018 کے تحت کئی اصلاحاتی اقدامات شروع کیے جن میں نئے آبی ذخائر کی تعمیر، جدید آبپاشی نظام اور مقامی سطح پر آبی کمیٹیوں کا قیام شامل ہے۔ کالا باغ، داسو اور بھاشا ڈیم جیسے منصوبے مستقبل کی آبی سلامتی میں کلیدی کردار ادا کر سکتے ہیں، بشرطیکہ ان پر شفافیت اور قومی اتفاق رائے کے ساتھ پیشرفت ہو۔
ماہرین کا کہنا ہے کہ پاکستان میں پانی کے ضیاع کا سب سے بڑا سبب قدیم نہری نظام ہے جو موسمیاتی تغیر کے سامنے غیر مؤثر ہو چکا ہے۔ جدید ڈرپ اور اسپرنکلر آبپاشی نظام سے فی ایکڑ پیداوار بڑھ سکتی ہے جبکہ 30 فیصد تک پانی کی بچت ممکن ہے۔ اسی طرح مصنوعی ذہانت (اے آئی) اور ڈیجیٹل آبی مانیٹرنگ سسٹم کے ذریعے پانی کے بہاؤ، بارش کے پیٹرن اور گلیشیئرز پگھلاؤ کی پیش گوئی ممکن ہے۔ حکومت کی جانب سے اے آئی پر مبنی واٹر انڈیکیٹر نیٹ ورک کے قیام کا منصوبہ اس سمت میں مثبت قدم ہے۔
پانی صرف زرعی یا تکنیکی مسئلہ نہیں بلکہ ایک سفارتی چیلنج بھی ہے۔ پاکستان کی خارجہ پالیسی میں آبی سفارتکاری کو مرکزی حیثیت دینا وقت کی ضرورت ہے۔ انڈس بیسن کے ممالک پاکستان، بھارت، افغانستان اور چین اگر مشترکہ مکالمہ شروع کریں تو خطے میں تعاون اور امن کی نئی بنیاد رکھی جا سکتی ہے۔ پاکستان نے حالیہ برسوں میں افغانستان کے ساتھ آبی مذاکرات کی بحالی اور مشترکہ کمیشن کی تجویز دی ہے تاکہ دریائے کابل کے بہاؤ پر ڈیٹا شیئرنگ ممکن بنائی جا سکے۔ اسی طرح پاکستان نے بھارت سے بھی انڈس کمیشن کے تحت شفاف اور تسلسل پر مبنی مذاکرات پر زور دیا ہے۔
جہاں دریا بہتے ہیں وہاں سفارت کاری بھی ضروری ہے، یہ محض نعرہ نہیں بلکہ جنوبی ایشیا کے پائیدار امن کے لیے ناگزیر ہے۔
پانی کے تحفظ کو صرف حکومتی پالیسیوں تک محدود رکھنا کافی نہیں، بلکہ کسان، شہری اور مقامی کمیونٹیز کو اس قومی مہم کا حصہ لازمی بنانا ہے۔ پانی بچاؤ، پاکستان بچاؤ جیسے پروگراموں کو عملی صورت دینے کے لیے عوامی شمولیت، آگاہی مہم اور تعلیمی اداروں میں واٹر ایجوکیشن متعارف کرانا ضروری ہے۔ ہر شہری کے لیے یہ سمجھنا لازم ہے کہ آج پانی کا تحفظ کل کے پاکستان کا تحفظ ہے۔ محفوظ کیا گیا ہر قطرہ قومی استحکام کی ضمانت ہے۔
پاکستان کی معیشت میں زراعت کا حصہ 19 فیصد سے زائد ہے مگر پانی کے غیر مؤثر استعمال نے اس شعبے کو کمزور کر دیا ہے۔ حکومت نے اب پائیدار زراعت کو قومی آبی حکمت عملی کا مرکز قرار دیا ہے۔ جدید بیج، کم پانی استعمال کرنے والی فصلیں اور بائیو ٹیکنالوجی کی بدولت پاکستان نہ صرف آبی خود کفالت حاصل کر سکتا ہے بلکہ خوراک کی سلامتی بھی یقینی بنا سکتا ہے۔ پانی کی بچت کے ساتھ فصلوں کی پیداوار میں اضافہ دراصل ماحولیاتی اور معاشی استحکام کی مشترک ضمانت ہے۔
پاکستان کے آبی مستقبل کو محفوظ بنانے کے لیے تین بنیادی ستون ضروری ہیں:
قومی سطح پر شفاف پالیسی اور انتظامی اصلاحات۔
علاقائی آبی تعاون اور سفارت کاری۔
ٹیکنالوجی، سائنس اور عوامی شعور پر مبنی جدید حکمت عملی۔
پانی کی قلت کو بحران نہیں بلکہ اصلاح کا موقع سمجھنا ہوگا۔ اگر آج ہم نے اجتماعی نظم اور سائنسی منصوبہ بندی سے کام لیا تو کل نہ صرف پاکستان بلکہ پورا جنوبی ایشیا آبی امن کا محور بن سکتا ہے۔
پاکستان کا مستقبل مؤثر آبی نظام اور علاقائی تعاون سے وابستہ ہے۔ ماحولیاتی تبدیلی کے اس دور میں آبی اصلاحات کسی تاخیر کی متحمل نہیں ہو سکتی۔ آبی سفارت کاری اور پائیدار زراعت دراصل قومی بقاء کی دو جہتیں ہیں۔
اس مضمون میں بیان کردہ خیالات اور آراء خصوصی طور پر مصنف کے ہیں اور پلیٹ فارم کے سرکاری موقف، پالیسیوں یا نقطہ نظر کی عکاسی نہیں کرتے ہیں۔
