جدید دور میں جنگیں صرف توپوں اور بندوقوں سے نہیں لڑی جاتیں۔ آج کی جنگ کا میدان وہ اسکرین ہے جو آپ کے ہاتھ میں ہے، وہ نیوز چینل ہے جو آپ کے گھر کی دیوار پر لگا ہے، اور وہ وائرل ویڈیو ہے جو آپ کے واٹس ایپ پر صبح سویرے آ جاتی ہے۔ آزاد جموں و کشمیر میں جب بھی کوئی احتجاج، انتظامی مسئلہ یا سیاسی اختلاف سامنے آتا ہے تو بھارتی میڈیا اور سرکاری حلقے غیر معمولی سرگرمی کا مظاہرہ کرتے ہیں۔ ان واقعات کو سیاق و سباق سے ہٹا کر پیش کیا جاتا ہے، انہیں بڑھا چڑھا کر بیان کیا جاتا ہے۔ یہ محض اتفاق نہیں، یہ ایک سوچی سمجھی حکمتِ عملی ہے۔
گزشتہ کچھ ماہ کے دوران آزاد کشمیر میں ایک ایسا منظرنامہ سامنے آیا جس نے ان تمام اندیشوں کو حقیقت میں بدل دیا جو پاکستان کے تجزیہ کار برسوں سے بیان کرتے چلے آ رہے تھے۔ ایک طرف کچھ شرپسند عناصر نے احتجاج کے نام پر تشدد کا راستہ اختیار کیا، پولیس پر حملے کیے، اسلحہ چھینا اور گولیاں چلائیں، جس کے نتیجے میں وفاقی پولیس کے 31 اور آزاد کشمیر پولیس کے 12 اہلکار زخمی ہوئے۔ دوسری طرف بھارتی گودی میڈیا نے اس سارے منظر کو اپنے مقاصد کے لیے استعمال کرنا شروع کر دیا۔
بات صرف رپورٹنگ تک محدود نہیں رہی۔ بھارتی میڈیا آزاد کشمیر کی صورتحال کو مسخ شدہ انداز میں پیش کرنے کے لیے پرانی، جعلی اور غیر متعلقہ ویڈیوز استعمال کر رہا تھا۔ بعض بھارتی نیوز چینلز نے کراچی میں ہونے والے احتجاج کی پرانی ویڈیوز کو آزاد کشمیر سے منسوب کرکے نشر کیا تاکہ عوام کو گمراہ اور مشتعل کیا جا سکے۔ یعنی جھوٹ کا کاروبار اتنا بے باک ہو گیا کہ ایک شہر کی ویڈیو دوسرے شہر کے نام چلا دی گئی۔
اس سے بھی آگے بڑھ کر، سوشل میڈیا پلیٹ فارم ایکس پر بھارتی اکاؤنٹس کی طرف سے جعلی ویڈیوز شیئر کر کے دعویٰ کیا گیا کہ آزاد جموں و کشمیر میں بڑے پیمانے پر جھڑپیں جاری ہیں اور جنگی صورتحال پیدا ہو چکی ہے۔ ان ویڈیوز میں ردوبدل کیا گیا اور فائرنگ کی آواز مصنوعی طور پر شامل کرکے شدید مسلح تصادم کا منظر پیش کرنے کی کوشش کی گئی۔ یعنی صرف جھوٹی خبر نہیں، بلکہ اس جھوٹ کو مصنوعی ذہانت کے ذریعے سجایا بھی گیا۔
افغان سوشل میڈیا اکاؤنٹس بھی آزاد کشمیر سے متعلق جعلی اور اے آئی سے تیار کردہ ویڈیوز کے ذریعے گمراہ کن مواد پھیلانے میں مصروف رہے۔ اور ساتھ ہی چند ملک دشمن بھگوڑے یوٹیوبرز اور مخصوص سیاسی جماعت نے بھی بھارتی میڈیا کے ساتھ مل کر پاکستان مخالف پروپیگنڈا مہم میں حصہ لیا۔ گویا ایک پوری فوج ترتیب دی گئی تھی، جس میں ہر کردار کا کام بٹا ہوا تھا۔
یہ تمام واردات دراصل بھارت کی ایک پرانی اور پہچانی ہوئی چال کا تازہ ایڈیشن ہے۔ احتجاج کے دوران مظاہرین اور پولیس کے درمیان ہونے والی جھڑپوں کی ویڈیوز کو بھارتی میڈیا پر "پاکستانی فورسز کے مبینہ مظالم” کے طور پر نشر کیا جاتا ہے۔ وہ مقامی سطح پر بجلی، آٹے کی قیمتوں یا سیاسی نشستوں کے انتظامی مطالبات کو "ریاست کے خلاف بغاوت” کا رنگ دینے کی کوشش کرتے ہیں۔ یعنی جو مسئلہ بجلی کے بل کا ہو، اسے آزادی کی تحریک بنا کر پیش کر دو۔
اسی تسلسل میں آزاد جموں و کشمیر کے سابق وزیر اعظم کی تقریر سے کچھ اقتباسات ویڈیو کی شکل میں اٹھائے گئے، اور انہیں سیاق و سباق سے ہٹ کر پیش کیا گیا۔ بھارتی خفیہ ایجنسی ‘را’ سے منسلک سوشل میڈیا پلیٹ فارمز نے بھی اس پروپیگنڈے میں بھرپور حصہ لیا۔ تراشے ہوئے کلپ میں ایک متبادل لفظ نے جملے کے معنی کو یکسر بدل دیا۔ یہ ہے گودی میڈیا کی پیشہ ورانہ بے ایمانی کا اصل چہرہ۔
اب سوال یہ اٹھتا ہے کہ بھارت یہ سب کیوں کر رہا ہے؟ اس کا جواب اتنا مشکل نہیں۔ ماہرین کا کہنا ہے کہ بھارت نہیں چاہتا کہ مقبوضہ کشمیر کا مسئلہ حل ہو اور اس لیے وہ مسئلہ کشمیر کو پس پشت ڈال کر آزاد جموں و کشمیر کے حوالے سے پروپیگنڈا کر رہا ہے۔ مقبوضہ کشمیر میں سات لاکھ سے زائد فوج، لاک ڈاؤن، گرفتاریاں، اور انسانی حقوق کی کھلی خلاف ورزیاں، ان سب سے توجہ ہٹانے کا سب سے آسان طریقہ یہی ہے کہ آزاد کشمیر کو جلتا ہوا دکھاتے رہو۔
ستمبر اکتوبر 2025 کے واقعات میں جب پولیس نے گرفتاریاں کیں تو گرفتار افراد سے اسلحہ، کمیونیکیشن ڈیوائسز اور ایسی دستاویزات برآمد ہوئیں جو عوامی امن کو خراب کرنے سے متعلق تھیں۔ یعنی یہ محض جذباتی احتجاج نہیں تھا، پیچھے ایک منظم منصوبہ کام کر رہا تھا۔ اور اسی منصوبے کو بھارتی گودی میڈیا نے اپنی اسکرینوں پر سجا کر "آزادی کی تحریک” کا نام دینا چاہا۔
لیکن ہوا کیا؟ کشمیری عوام نے بارہا جھوٹے پروپیگنڈے کو مسترد کیا اور جھوٹے بیانیے اور جعلی ویڈیوز کے ذریعے بھارتی میڈیا پہلے ہی اپنی ساکھ کھو چکا ہے۔ وہ عوام جن کو بھڑکانے کی کوشش کی گئی، انہوں نے اس پروپیگنڈے کو اپنے پیروں تلے روند ڈالا۔
یہ واقعہ ہمیں ایک بڑا سبق دیتا ہے۔ جب کوئی فسادی گروہ میدان میں اترتا ہے اور کوئی غیر ملکی میڈیا مشینری اسی وقت بالکل اسی "اسکرپٹ” پر چلنے لگتی ہے، تو یہ محض اتفاق نہیں ہوتا۔ ایک ہی وقت میں، ایک ہی بیانیہ، ایک ہی مقصد، یہ گٹھ جوڑ کی وہ تعریف ہے جو لغت میں نہیں لکھی گئی، مگر زمین پر لکھی جا رہی تھی۔
آزاد کشمیر کے عوام نے اپنا فیصلہ سنا دیا ہے، اور وہ فیصلہ یکسر واضح ہے۔ خارجیت اور دہشت گردی کے راستے پر چلنے والے اور انہیں استعمال کرنے والے دونوں ناکام ہو گئے۔ نہ تشدد کا ایجنڈا چلا، نہ پروپیگنڈے کا تماشا چلا، نہ گٹھ جوڑ کا جادو چلا۔ کشمیر کی مٹی نے ایک بار پھر ثابت کیا کہ اسے باہر سے آنے والے نعروں کی نہیں، اپنی جڑوں کی پہچان ہے۔
