آزاد جموں و کشمیر کی سپریم کورٹ کا 7 جون 2026 کا فیصلہ محض ایک عدالتی رائے نہیں، بلکہ یہ آئین کی بالادستی، تاریخی انصاف اور لاکھوں بے گھر کشمیریوں کے حق نمائندگی کی باقاعدہ توثیق ہے۔ صدارتی ریفرنس نمبر 1 (2026ء) پر چیف جسٹس راجہ سعید اکرم خان کی سربراہی میں فل کورٹ نے جو رائے دی، اس نے ایک بار پھر ثابت کر دیا کہ جمہوریت اور آئین پرستی کا کوئی متبادل نہیں۔
آزاد جموں و کشمیر کی قانون ساز اسمبلی کے 53 اراکین میں 12 نشستیں ان کشمیری مہاجرین کے لیے مخصوص ہیں جو 1947 اور 1965 کی جنگوں کے نتیجے میں اپنے گھروں سے اجڑ کر پاکستان کے مختلف شہروں میں آباد ہوئے۔ ان میں سے چھ نشستیں جموں ڈویژن کے تقریباً 4 لاکھ 34 ہزار مہاجرین کی نمائندگی کرتی ہیں جبکہ چھ نشستیں وادیٔ کشمیر کے تقریباً 30 ہزار مہاجرین کے لیے ہیں۔ یہ نشستیں کوئی سیاسی مراعات نہیں بلکہ ان لوگوں کے جمہوری حق کا آئینی اظہار ہیں جنہوں نے اپنا وطن تو کھویا مگر اپنی شناخت اور آواز نہیں کھونے دی۔
تاریخی جڑیں، آئینی تسلسل
سپریم کورٹ نے اپنی تفصیلی رائے میں ان نشستوں کی قانونی تاریخ کا جائزہ لیتے ہوئے واضح کیا کہ ان کی بنیاد 1960 کے انتخابی انتظامات، 1964 کے آئینی حکم، 1967 کی تصدیق، 1970 کی قانونی اصلاحات، 1974 کے آئین آزاد کشمیر اور 1975 کے ایکٹ پر استوار ہے۔ عدالت نے ان نشستوں کو "ایک گہری تاریخی اور قانونی سچائی کا آئینی اظہار” قرار دیا۔ یہ وہ سچائی ہے جو 1947 کی تقسیم اور اس کے بعد ہونے والے تنازعات کے نتیجے میں بے گھر ہونے والے لاکھوں کشمیریوں کے درد میں پنہاں ہے۔
آرٹیکل 22 کے تحت آئینی تحفظ کا مطلب یہ ہے کہ کوئی بھی انتظامی حکم، سیاسی معاہدہ یا احتجاج ان نشستوں کی حیثیت کو تبدیل نہیں کر سکتا۔ اگر کوئی تبدیلی مطلوب ہو تو اس کے لیے آرٹیکل 33 کے تحت باقاعدہ آئینی ترمیم ناگزیر ہے، اور یہ ترمیم عوامی مینڈیٹ، پارلیمانی بحث اور آئینی طریقہ کار کے ذریعے ہی ممکن ہے۔
آئینی بالادستی کا اصول
اس فیصلے کی سب سے اہم اور دور رس بات یہ ہے کہ سپریم کورٹ نے صراحت کے ساتھ کہا کہ آزاد کشمیر میں فیصلہ کن اختیار آئینی میکانزم کے ذریعے استعمال ہوتا ہے۔ عدالت نے آرٹیکل 22(4) کا حوالہ دیتے ہوئے کہا کہ بروقت انتخابات کا انعقاد آئینی فریضہ ہے اور سیاسی تنازعات انتخابی عمل میں رکاوٹ نہیں بن سکتے۔ پرامن احتجاج آئینی حق ہے، تاہم انتخابی اور ریاستی عمل کو آئینی حدود کے اندر رہنا چاہیے۔
یہ رائے اس امر کو مزید واضح کرتی ہے کہ انتخابی عمل، نمائندہ اداروں اور آئینی ڈھانچے کا تحفظ ریاستی و جمہوری استحکام کے لیے ضروری ہے۔
مسئلہ کشمیر کا آئینی جہت
مہاجر نشستیں محض نمائندگی کا سوال نہیں، یہ مسئلہ کشمیر کی تاریخی، قانونی اور آئینی شناخت کا حصہ ہیں۔
جب تک یہ نشستیں آزاد کشمیر کی اسمبلی میں موجود ہیں، اس وقت تک یہ اعلان جاری رہتا ہے کہ مقبوضہ جموں و کشمیر سے اجڑے ہوئے لاکھوں افراد کا درد نہ صرف یاد ہے بلکہ اسے آئینی تحفظ حاصل ہے۔ ان نشستوں کا وجود یہ یاد دہانی ہے کہ مسئلہ کشمیر ایک زندہ حقیقت ہے جسے کسی انتظامی فیصلے سے ختم نہیں کیا جا سکتا۔
سپریم کورٹ کے اس فیصلے کا وقت بھی اہمیت رکھتا ہے کیونکہ آزاد کشمیر میں 2026 کے انتخابات کا شیڈول سامنے آ چکا ہے اور سیاسی سرگرمیاں عروج پر ہیں۔ ایسے موقع پر عدالت کا یہ واضح موقف کہ انتخابات آئینی ذمہ داری ہیں اور انہیں مقررہ آئینی عمل کے مطابق منعقد ہونا چاہیے، پورے جمہوری نظام کو مضبوط بناتا ہے۔
آگے کا راستہ
اس تاریخی عدالتی رائے کے بعد تمام سیاسی جماعتوں، سول سوسائٹی اور اداروں کی ذمہ داری بنتی ہے کہ وہ آئین کی بالادستی کو اپنا رہنما اصول مانیں۔ مہاجرینِ جموں و کشمیر کی نمائندگی ایک آئینی امانت ہے اور اس امانت کی حفاظت تمام اداروں پر یکساں طور پر فرض ہے۔ اگر مستقبل میں کوئی اصلاح مطلوب ہو تو وہ اسمبلی کے فلور پر، عوامی مینڈیٹ کے ساتھ اور آئینی طریقہ کار کے تحت ہونی چاہیے۔
سپریم کورٹ آزاد جموں و کشمیر کا یہ فیصلہ آئین کی فتح، قانون کی فتح اور ان تمام کشمیریوں کی فتح ہے جنہوں نے دہائیوں تک اپنے حق نمائندگی کی حفاظت کی۔
اس مضمون میں بیان کردہ خیالات اور آراء خصوصی طور پر مصنف کے ہیں اور پلیٹ فارم کے سرکاری موقف، پالیسیوں یا نقطہ نظر کی عکاسی نہیں کرتے ہیں۔
